Cardiff MS. 1.363 (Hafod 2) – page 159r
Brut y Brenhinoedd
159r
a orwcpwyt. ac o teyrnassoed ffreync
ac o|r amraỽalyon enyssed er eygyaỽn.
o|r a dyleynt dyỽot yr llys.
AG wrth henny e deỽthant eno. Araỽn.
ỽap kynỽarch brenyn escotlont. vry+
en y ỽraỽt brenyn reget. katwallaỽn lla+
w hyr brenyn Gwyned. Meỽryc brenyn
dyvet. kadwr llemenyc brenyn kernyw.
Try archescop enys prydeyn. nyt amgen.
archescop llỽndeyn. ac ỽn kaer efraỽc. a
Dyffryc archescop kaer llyon ar wysc. e
penhaf onadỽnt. a legat y pap rỽueyn oed.
Ac y gyt a henny eglỽr oed o|e santolyaeth a|y
wuchwed. kanys pob kyffryw cleỽyt o|r a ỽ+
ey ar dyn ef a|e gwaredey trwy y wedy. Ac
y gyt a henny wynt a deỽthant tewyssogy+
on o|r dynassoed bonhedyc. nyt amgen. Mor+
ỽd yarll kaer gloew. Meỽryc o kayr wyragh+
on. Anaraỽt o salesbrỽ. Arthal o warwyc.
Oweyn o kaer lleon. Cỽrsalem o kaer llyr.
kynỽarch yarll kaer keynt. Gwallavc ỽap
llynnavc o amwythyc. ỽryen o kaer badon.
| « p 158v | p 159v » |