Cardiff MS. 1.363 (Hafod 2) – page 64v
Brut y Brenhinoedd
64v
taf y kyscvs ef y gyt a hy a ỽynnỽs ynteỽ y ỽ+
ot yn anrydedỽs enwaỽc ac yd erchys ynteỽ
yr|amheraỽdyr gwneỽthvr dynas hono me+
gys y bey hvnnỽ yn kadỽ kof y neythyaỽr h+
onno hyt ỽravt trwy holl oessoed. Ac yn y lle
honno yd adeylỽs Gloeỽ kessar dynas yr h+
on a elwyr o|e enw ef. kaer Gloew yr hyn+
ny hyt hedyw yg kyffynyd kymry a lloegyr
ar lan hafren. Ac|ereyll a dywedant y mae y
kan y loyw wlat lydan map Gloeỽ kessar a
ganet. yn|y dynas hvnnv gwedy hynny y ka+
vas y dynas honno y enw y gwr gwedy Gwey+
ryd a wu tewyssaỽc ar kymry. AC yn ams+
er hỽnnỽ yg kaerỽssalem y kymyrth yr arg+
lwyd Jessỽ crist map dyw dyodeyfyeynt yr
prynnỽ kenedyl dyn a oed yg keythwet* agha+
naỽc dyafỽl trwy yr holl oessoed kyn no hynny.
Ac yna yr rydhaỽs ynteỽ wynt trwy y agheỽ
ynteỽ ac ellyghedygaeth y waet ef. AC yna
gwedy adeylat y kaer a thangnheỽedỽ yr ynys
ymchwelỽt a orỽc Gloew kessar yr rỽueyn. a|lly+
wodraeth yr ynyssed a orchymynnỽs y Gweyryd.
AC yn yr amser hỽnnỽ y dechrewys pedyr
ebostol yn kyntaf Gossot y kadeyr yn yr an+
| « p 64r | p 65r » |