Cardiff MS. 1.363 (Hafod 2) – page 70r
Brut y Brenhinoedd
70r
ac y kỽplawyt y gweyth o|r mor pwy gylyd
yr·rwng deyfyr a brenych a|r gogled. A hỽ+
nnỽ trwy lawer o amseroed gwedy hynny
a dyffyrth ac a ytelys rỽthreỽ a chyr·cheỽ y
gelynyon. Ac ysef a orỽc sỽlyen gwedy gw+
elet o·honaỽ ef na alley ef a|e porth gwrth·wy+
nebỽ yr amheraỽdyr. mynet hyt yn scythya
y keyssyaỽ nerth a phorth y gan y ffychtyeyt y
oreskyn y kyỽoeth tracheỽyn. Ac gwedy ky+
nnỽllaỽ o·honaỽ holl yeỽenctyt y wlat|hon+
no y gyt a dyrỽaỽr lynges y deỽth hyt yn yn+
ys prydeyn. Ac yn dyannot kylchynỽ kaer
efraỽc ac ymlad ar dynas. Ac gwedy ehedec
e chwedyl tros y gwladoed. yr ran mwyhaf
o|r brytanyeyt a ymadavssant ar amheraỽ+
dyr ac a aethant at svlyen. Ac eyssyoes yr he+
nny ny pheydyvs severvs a|e dechrevoed ef
namyn o pob lle kynnỽllav yr rỽueynwyr
ef ar brytanyeyt a trygessynt y gyt ac
yn dyannot kyrchỽ tv a chaer efraỽc ac ym+
lad a sỽlyen. Ac gwedy ymlad yn wychyr
o·nadỽnt yr amheraỽdyr a las yna a llawer
| « p 69v | p 70v » |