Oxford Jesus College MS. 57 – page 269
Llyfr Blegywryd
269
yỽ. o|r keffir ỻedrat yn ỻ˄aỽ. nev ar geuyn y|dyn.
neu wedy y vỽrỽ y ar y geuyn y|r ỻaỽr. am bop
un o|r rei hynny reit yỽ keissaỽ ardelỽ kyfre+
ithaỽl a|e gỽahano ac ef neu vot yn ỻeidyr
kyfadef. O deruyd marỽ gỽr o dref kyfrif. ny ̷
dylyir ebediỽ idaỽ. kany dylyir bot erỽ diffo ̷+
dedic yn|y dref honno. Pop kyttir a dylyir y ̷
gynnal a ỻỽ ac a|thal. ac ar ny|s kynhalyo
coỻet y rann o|r tir. Gỽedy ranher y tir ny
dyly neb talu da dros tir y gilyd. ỽynteu a
dylyant y gynnal ac eu|ỻỽ bop un gan y gi+
lyd. Sef hyt y dylyant brodyr. a|chefynderỽ.
a|chyuerderỽ. ac o·ny|s kynhalyant. eniỻent
y|tir a|adassant y goỻi oc eu hachaỽs. O
hynny aỻan ny dylyant rannu tir. a|chany
dylyir y rannu ny dyly neb kynnal rann
y gilyd. nac o|e laỽ* nac o|e da. Ny dylyir di+
henydyaỽ caeth o cheffir chỽeugeint drostaỽ
am y ỻedrat kyntaf. O deruyd y dyn rodi
mach y araỻ ar beth. Jaỽn yỽ idaỽ rydhau
y mach. o vn o teir fford y|byd ryd mach. ae o
| « p 268 | p 270 » |