NLW MS. 3035 (Mostyn 116) – page 116v
Brut y Brenhinoedd
116v
kanẏ doethant y hamdiffẏn pan|ẏ gỽerescy·nassam nac o| e gỽa+
rafun. Ac ỽrth hynẏ ny ỽrthebỽn ni vdunt o| r rei hẏnẏ.
A gỽedy teruynhu o arthur y ymadraỽd. hywel vab
emyr| ỻydaỽ a ỽrthebaỽd ymlaen paỽb y ymadraỽd
arthur val hyn. Pei traethei pop vn o·honom ni oỻ
a medylyaỽ pop peth yn| y vedỽl. ny thebygaf|i gaỻu o
neb o·honam ni rodi kygor gỽerthuorogach nac atteb
grynoach na doethach no| r hỽn a racuedylyaỽd doethi+
nab yr arglỽyd arthur e| hun Ac ỽrth hynẏ yr hyn a
racwelas medỽl doeth anyanaỽl gỽastadaỽr. ninheu
yn| hoỻaỽl moli hỽnnỽ a dylyỽn a| e| ganmaỽl yn wastat
kanys yn herwyd y dylyet a dywedy ti. o myny ti kyrch+
u rufein ny phedrussaf. i. yd aduerỽn ni o| r uudugolya+
eth hyt tra vom ni yn amdiffyn an rydit hyt tra geis+
som ni an jaỽn y gan an gelynyon y peth y| maent ỽẏ
yn gam yn| ẏ geissaỽ y genhym ninheu. kanys pỽy bynac
a geisso dỽyn y vreint a| e dylyet gan gam y gan araỻ.
teilỽg yỽ idaỽ ynteu koỻi y vreint a| e dylyet. Ac ỽrth
hyny kanys gỽyr rufein yssyd yn| keissaỽ dỽyn yr einim
ni; heb amheu ninheu a dygỽn racdunt ỽy yr eidunt.
o ryd duỽ. gyfle y ymgyfaruot ac ỽynt a| ỻyma gy+
faruot damunedic y| r hoỻ vrytanyeit. Ỻyma darogan+
eu sibli yn dyuot yn wir a| dywaỽt. dyuot o| genedyl
y brytanyeit tri brenhin a| werescynynt rufeinaỽl am+
herodraeth A| r deu a| ry| fu Ac yr aỽr hon yd ym y| th gaf+
fel titheu yn drydyd yr hỽn y tywys blaenwed rufein+
aỽl an·ryded. O| r deu neur deryỽ eilenwi yn amlỽc
megys y| dywedeist|i y| r eglur tywyssogyon beli a| chus+
tenhin. pop vn o·nadunt a| vuant amherodron yn rufein
Ac ỽrth hyny bryssya titheu y gymryt y peth y| mae duỽ
| « p 116r | p 117r » |