NLW MS. 3035 (Mostyn 116) – page 63v
Brut y Brenhinoedd
63v
uot Meuruc rac bron maxen. kymeredic vu gantaỽ ef
ymlaen paỽb yn enryded. Ac yn yr amser hỽnnỽ ter+
uysc a|ryfel maỽr a oed rỽg maxen a|deu amheraỽdyr
ereiỻ oed yno. Gracian a valaỽn y vrodyr e|hun. kanẏs
e|hun y rei hynnẏ a|r daroed vdunt gỽrthlad maxen
o|r drydet ran o|r amherodraeth a hynny a oed ỽrth+
rỽm gantaỽ ynteu A gỽedy gỽelet o vaxen o* veuruc
yn gywar·sagedic y|gan yr amherodron. Sef y|dywa+
ỽt meurc ỽrthaỽ yr amadraỽd hỽn. Maxen heb ef
py achaỽs y diodefy di dy tremygu val hyn. a fford
i|titheu y ymwaret Dabre y ynys prydein a chymer
coron y teyrnas a|e brenhinyaeth. kanys eu·daf vren+
hin yssyd hen Ac nyt oes dim a damunho namyn
kaffel dylyedaỽc o|rufein ỽrth rodi y verch idaỽ a|e
vrenhinyaeth genti. kanyt oes idaỽ etifed namyn hi
Ac ỽrth hẏnnẏ y|kafas yn|y gygor ef a|e wyrda rodi itti
y verch a|e teyrnas genti. Ac o|r achaỽs hỽnnỽ y|m|han+
uonet ineu yma. Ac o|myny titheu dyuot gyt a|mi hẏt
yno pop peth a vyd paraỽt itti o|hẏnnẏ. A gỽedy keffych
hẏnnẏ o amylder eur ac aryant a marchogyon ynys
prydein y geỻy gỽerescyn yr amherodron Ac odyna
yr hoỻ vyt. kanys o ynys prydein y kauas custenin
dy gar di amherodraeth rufein Ac o·dyna yr hoỻ
vyt a|ỻawer ygyt ac ynteu. Ac o ynys brydein a gynyd+
A c ỽrth yr ymadrodyon hẏnnẏ ~ ~ ~ assant rufein.
y|kychwy·ỽys Maxen y·gyt a meuruc vab ka+
radaỽc hyt yn ynys prydein. Ac ar y|fford eissoes
yn mynet y darestygỽys kaereu freinc a|e dinassoed
ac y gỽeres·gynỽys ỽynt. A|chynuỻaỽ ỻawer o sỽỻt
ỽrth y rodi o|e varchodẏon* ac amlau y|teulu A gỽedẏ
| « p 63r | p 64r » |