NLW MS. 3035 (Mostyn 116) – page 85v
Brut y Brenhinoedd
85v
Ac y|ffy hyt yn flandrẏs neu normandi A gỽedy ẏ
kyffrohont ỽynteu y baed yskithraỽc yd ymchoelannt
o vordỽy y wneuthur dadleu a|r ỻỽynaỽc. Pan el
ynteu y|r dadleu yd ymwna yn varỽ Ac enwired
y baed a gyffroa. Yn|y ỻe y kyrch ynteu y gelein
A|phan del vch y ben. Y chwyth yn|y ỽyneb a|e ly+
geit. Sef a|wna y|ỻỽynaỽc heb ebryfygu y gno+
taedic vrat. Temigyaỽ y troet assỽ a|e diwrei+
daỽ oỻ o|e gorff. yd|ysclyf ynteu y|clust deheu y|r
ỻỽynaỽc a|e loscỽrn gan neityaỽ dra|e|gefyn Ac yg
gogofeu y|mynyd yd ymdirgela ỽrth hynẏ y baed
tỽyỻedic a geiss y bleid a|r arth y eturyt idaỽ y goỻ+
edigyon aelodeu. Y rei gỽedy elont yn dadleu a
adaỽant deu troet a|chlust a|ỻoscỽrn Ac o|r rei hyny
gỽneuthur a·elodeu hỽch idaỽ. Darestỽg a wna yn+
teu y hẏnẏ. Ac arhos y edewit. Yn hyny y diskyn
y|ỻỽynaỽc o|r mynyd. Ac yd ym·ritha yn vleid A
mynet a|wna y gyfrỽch a|r baed Ac yn ystrywys
y|ỻỽnc yn gỽbyl Odyna yd ymritha yn vaed. a
megys heb aelodeu yd ery y vrỽydyr Ac eissoes
gỽedy delhont o deissyfyt deint y|ỻad Ac o pen y|ỻeỽ
y coronheir hi. Yn dydyeu hỽnỽ y genir sarff Ac a
ymdywinic yn agheu y rei marwaỽl. O|e hyt ef
y|kylchyna ỻundein ac a el heibaỽ a lỽnc Yr ych
mynydaỽl a gymer bleid a|e danhed a|wynhaa
yg|gỽeith mor hafren Ef a gytymdeitha idaỽ|ken+
ueinoed y|gogled a|chymry. Y|rei a sychant auon tem+
ys gan y|hyfet Yr assen a eilỽ bỽch hir y varyff a|e
furyf a symut Jrỻonhau a wna y|mynydaỽl yny
bo galwedic y bleid tarỽ a|wan y gyrn yndunt.
| « p 85r | p 86r » |