NLW MS. 3036 (Mostyn 117) – page 77
Brut y Brenhinoedd
77
uein. A guedy eu dyuot hyt ym porth rỽydyn. nach ̷+
af weiryd a|llu maỽr gantaỽ yn eu herbyn. yn·yd oed
aruthyr gan wyr rufein amhylder eu niuer ac eu
gleỽder. Ac ỽrth hynny ny lauassassant kyrchu y|tir
ar eu torr. namyn trossi eu hỽyleu a chyrchu racd+
unt hyny doethant hyt yn traeth tỽtneis yr tir. A
guedy caffel o vaspasianus a|e lu y tir. y kyrchassant
parth a|chaer penhỽylcoet. yr hon a elwir ar aỽr hon;
exon. A guedy dechreu ymlad a|r gaer honno ym pen
y seithuetdyd nachaf weiryd a|e lu gantaỽ. Ac yn di ̷+
annot yn ymlad ac ỽynt. A|r dyd hỽnnỽ y llas llawer
o pop parth. Ac ny chauas yr vn y uudugolyaeth. A
thrannoeth guedy bydinaỽ o pop parth. y doeth
y urenhines y·rydunt. Ac y tagnouedỽys eu tyw+
yssogyon. Ac odyna yd anuonassant eu kytuarch+
ogyon hyt yn iwerdon. A guedy mynet y gayaf
heibyaỽ; ymchoelut a oruc vaspasianus parth a
rufein. A thrigyaỽ a oruc Gueiryd yn ynys prydein.
A guedy dynessau Gueiryd parth a heneint. karu
guyr rufein a oruc. A|thraethu y teyrnas trỽy he+
dỽch a|thagneued. A chadarnhau y kyfreitheu a oed
ossodedic yr y dechreu. A gossot ereill o newyd. A
rodi rodyon maỽr ehalaeth y|r a|e harchei. Ac yuelly
y ehedỽys y|glot tros teruyneu europa. Ac ygyt a
hynny y|ofyn a|e garu a|oed ar wyr rufein. A mỽy
a|treythit ac a dywedit ym·danaỽ yn rufein noc
am vrenhined holl teyrnassoed y byt. A hynny
| « p 76 | p 78 » |