Breudwd Welsh Prose 1300-1425
Cymraeg

NLW MS. Peniarth 18 – page 44r

Brut y Tywysogion

44r

DEg|mlyned a phetỽar|vgein. a|chant. a|mil.
oed oet crist. pann aeth phylip urenhin.
ffreinc. a rickert urenhin lloegyr. a|bal+
tỽyn archescob keint. A|diruaỽr luosogrỽyd o|ieirll
A|barỽnyeit ygyt ac ỽynt y|garussalem. Yn|y ulỽ+
ydyn honno yd adeilaỽd y arglỽyd rys castell ket+
ỽeli. Ac y|bu uarỽ gỽenllian verch rys. blodeu. a|the+
gỽch holl gymry. Y ulỽydyn racỽyneb y|bu uarỽ
grufud maelaỽr yr haelaf o|holl tyỽyssogyon kymry.
Y ulỽydyn honno heuyt y bu varỽ gỽiaỽn escob.
bangor. gỽr maỽr y|greuyd. a|e anryded. a|e teilyg+
daỽt. Ac y|bu diffyc ar|yr heul. Y|ulỽydyn honno
y|bu uarỽ baltỽin archescob keint. Ac yna y|llas
einaỽn o|r porth y gann y vraỽt. Ac y|goresgynaỽd
yr arglỽyd rys castell niuer. Ac y|bu uarỽ yỽein
ap rys yn ystrat flur. Y ulỽydyn racỽynep y|di+
egis maelgỽn ap rys o|garchar arglỽyd brechein+
naỽc. Ac y|goresgynnaỽd yr arglỽyd rys castell
llann y hadein. Ac y|bu uarỽ grufud ap cadogon. Y
ulỽydyn racỽyneb y delis neb un iarll. rickert
vrenhin lloegyr. Ac ef yn|dyuot o garussalem.
Ac y|dodet yg|karchar yr amheraỽdyr. A|thros y e+
llygdaỽt ef y|bu diruaỽr treth dros ỽynep holl
loegyr. yn gymeint ac nat oed ar|helỽ eglỽyssỽr
na|chreuydỽyr. nac eur nac aryant hyt yn oet
y|caregyl a dotrefyn yr eglwysseu. ar ny orffei y