NLW MS. Peniarth 190 – page 111
Ystoria Lucidar
111
dieithyr a|wnel yr|eneit drỽydaỽ megys drỽy
beiryant. paham y kyfyrgoỻir ef. Magister|Pan ry+
uelo dynyon ar eu|gelynyon. ỽynt a|distryw+
ant eu hadeilyadeu yn gyntaf. neu a|e ỻosgant.
ac odyna y diueir y perchennogyon. megys
y doluryont o goỻi eu da. ac o boeni eu kyrf.
Y corff weithyon yssyd bressỽyluot y|r eneit.
ac am dremygu o·honaỽ y creaỽdyr y dis+
trywir y·gyt ac ef. ac vn ynt. kanys beth
bynnac a|wnel yr eneit ef a|dywedir y wneu+
thur o|r corff. ac ỽrth hynny iaỽn yỽ y boe+
ni y·gyt ac ef. discipulus Pa saỽl eneit a|deuant y
nef. Magister Y saỽl a|drigyassant yno o engyly+
on. discipulus Da digaỽn yd attebeist ym am hyn+
ny. discipulus Dywet ym beth am vynedyat y|rei
drỽc. Magister|Pan dranghont y deuant y ky+
threuleit yn heideu a phresteỻach uaỽr
ganthunt yn aruthyr eu gỽelet. ac yn de+
chrynedic eu gỽeithret. Ac yna y kymheỻ+
ant yr eneit rac kadarn boen y vynet
aỻan o|r corff. a|e dynnu ganthunt yn greu+
laỽn. y byrth uffern. discipulus Pa beth yỽ uffern
| « p 110 | p 112 » |