NLW MS. Peniarth 46 – page 70
Brut y Brenhinoedd
70
ar y uraỽt. a phan weles beli vran.
yn dyuot gan arỽyd tagneued. diot y
arueu a wnaeth ynteu. a mynet dỽylaỽ
mynỽgyl. ell|deu. a chymodi y deu lu a
dyuot y·gyt hyt yn llundein.
AC ym·pen yspeit guedy eu bot y·gyt yn
enys prydein oc eu kyt·gyghor y kych+
uyniant parth a freinc a llu diruaỽr
y ueint ganthunt. a chet bei trỽy lawer
o ymladeu y kymellassant holl tywyssog ̷+
yon freinc yn wedaỽl darystygedic ud ̷+
unt. a chan uudugolyaeth ar freinc
y·gyt ac ỽynt kyn pen y ỽlỽydyn a
gyrchassant parth a ruuein. a dan an+
reithaỽ a ỽrthỽynepei udunt heb trugared.
AC yna yd oedynt gabius. a phorcenna
yn amerodron yn ruuein. a guedy guel+
et o|r gỽyr hynny na ellynt ym·erbyn
a beli. a bran. dyuot yn uuyd a wna+
ethant y rodi darystygedigedigaeth*
udunt. ac uuyddaỽt. ac adaỽ teyrnget
udunt o ruuein. pob plỽydyn gan gan ̷+
hyat sened ruuein yr gadu tagneued
| « p 69 | p 71 » |