Oxford Jesus College MS. 119 (The Book of the Anchorite of Llanddewi Brefi) – page 52v
Ystoria Lucidar
52v
ac a|delont yno. A allant ỽy ymdangos pann
y|mynnont nev yr neb y|mynnont. nac yn gỽy+
lyaỽ y|bont nac yn kyscu. y|rei yssyd yn|y pur+
dan hagen nyt ymdangossant onny|s ken+
nyatta engylyon vdunt y geissaỽ y|rydhav.
neu y|venegi eu lleỽenyd o|e ketymdeithon am
y|rydit. Y|rei hagen yssyd yn vffernn ny a*
allant ỽy ymdangos y|neb. Ac o gỽelir ỽynt
yn ymdangos weithev nac yn hun nac yn
dieithyr hun. nyt ỽynt ỽy vydant. namyn
dieuyl yn|y rith. Ac ỽynt a|rithyant ygos+
ged engylyon da y dỽyllaỽ dynyon. Os ỽyn+
tev hagen a|damỽeinha ymdangos ohonunt
yn wir. o|obrỽy sant vyd hynny. megys yd
ymdangosses eneit y|lleidyr y|varnu yn|y lle
y|distryỽaỽd yr allaỽr. nev yr dysc megys yd
ymdangosses yr eneit y|seint benet yn rith
agkyngyl a|phenn. a|lloscỽrnn assen idaỽ.
A|e ganaỽl yn arth. Ac yn|dyỽedut vot yn|y
lusgaỽ nos a|dyd ar draỽs lleoed a|drysỽch.
Ac yn|y diỽed y llyngkit yg krochan vffern.
Ym pa furyf yd ymdangossant ỽy. Yn furyf
dyn gann gymryt corff o|r aỽyr. O ba le y
daỽ breudỽydon. Y|daỽ weithev y|gann duỽ.
pann vannacker peth a|del rac llaỽ. megys
| « p 52r | p 53r » |