Oxford Jesus College MS. 119 (The Book of the Anchorite of Llanddewi Brefi) – page 84r
Ymborth yr Enaid
84r
byr pefyrganneit disgleirder megys maen mere+
rit llathreit yg|kymherued byrllysc o|r baem glo+
yỽduaf a|vei. Ac odyna y·dan deu amrant gann+
heitlathyr. Ac ambell|uleỽ gloyỽduon arnunt.
megys ar yr aelev yd|oed deu rudellyon lygeit.
Pỽmpaed dremwalcheid. Ac onadunt yn gỽanegv
mandagreu karueidserch. megys manỽlith mis
mei neu van dafynnev o aryan byỽ a|hynny o an+
nỽylserch garyat ar|y|ffydlonyon greaduryeit.
ar dagreu hynny a elỽit gỽyth yr yspryt glan.
y|rei hynny a|dygỽydynt y|myỽn kalonneu y
penytdynyon a|ỽnelynt eu penyt yn teilỽg. A|di+
ogel vydei yno ry|gaffel rat y|gann yr yspryt glan.
a|e gỽbyl annỽylserch garyat. Ac yrỽg y|deu rud+
dellyon lygeit yd|oed yn kyrchu byrgrỽnn desdlus+
lỽys enev. A|thrỽyn kyfladrum vnyaỽnllun. ffro+
enev agoret ac yn gỽanegu serchaỽlvryt gary+
at o arafber gyffro y|dỽyỽolyon ffroenev. Ac yg
kylch y|nefaỽl drỽyn hỽnnỽ yd|oed deuglaerỽynny+
on gannheitbryt wyneb kyngrynnyon. A|rych+
ỽant amyl yr gỽr mỽyhaf yn|y hyt. Ac arall y|llet.
Ar gỽynnvydic wyneb hỽnnỽ a|oed kynn|decket.
a|chynn egluret ac na ellit kyffelybu idaỽ neb ryỽ
greadur corfforaỽl na nefaỽl na dayaraỽl. megys
gỽynneiry ystỽyll nev wynnvlodev rosys nev lilys.
| « p 83v | p 84v » |