NLW MS. Llanstephan 27 (The Red Book of Talgarth) – page 58v
Ystoria Adrian ac Ipotis
58v
prid y gỽnaethpỽyt knaỽt dyn. ac o|r dyfỽr y waet. ac
o|r heul y gallon a|e yspeil. a|e waredogrỽyd a|e gampeu
da. Ac o|r awyr y synnỽyr. ac o|r gỽynt y anadyl. ac ̷
o|r mein y escyrn. ac o|r yspryt glan y gorucpỽyt y e ̷+
neit. A|r neb a vo ragor ganthaỽ o|r dayar amdrỽm dia+
ỽc gystudedic vyd herwyd annẏan dayaraỽl. ac amdrỽm
vyd y vedỽl a|e weithret. a|r neb a vo rann vỽyaf yndaỽ
o|r dỽfyr moraỽl a uyd llauurus drabludyus gyghor ̷+
uynus chỽennychus am tir a dayar a golut pressennaỽl. a ̷
hynny a vyd palledic idaỽ ỽrth y reit a|e diwed. o achos
uot yn gynhebic golut dayaraỽl y lanỽ a threi herỽyd
anwadalrỽyd. Pỽy bynnac a vo yndaỽ y dyfnyd mỽyaf
o|r gỽynt. ef herwyd annyan a vyd amysgaỽn a gorwyllt.
yn|y gallon ac yn|y vedỽl. o dywedut anosparthus eireu
heb deall a heb synnỽyr yndunt. A|r neb a|vo ragor yndaỽ
o defnydyeu yr awyr. herwyd annyan doeth vyd. yg|ge+
ir ac yg|gỽeithret kanmoledic. a|r neb a vo ragor yndaỽ
o|r heul aruthurgryf ac amhỽyllic vyd. a gỽressaỽc ym+
ysgaỽn herwyd annyan. A|r hỽn a vo yndaỽ ragor o
dyfnyd y maen ef a vyd gỽastadaỽl y vedỽl. diogel yn
trauael. kywir yg|geir a gỽeithret. a gỽyrdlasliỽ y gna ̷+
ỽt. A|r neb a hanffo uỽaf* yndaỽ o defnyd y gan yr ys+
pryt glan. ef a vyd kyflaỽn y gallonn o vedylleu* da.
a geir prud. a gỽeithret da kyfyaỽn ỽrth tlaỽt a noeth.
a charu duỽ. a gỽneuthur amryuaylon benydyeu. Ẏr
amheraỽdyr a ovynnaỽd yna pa beth oed y mor. Y
mab a dyỽaỽt mae fford wylltueith y cherdet. ti a
| « p 58r | p 59r » |