NLW MS. Llanstephan 4 – page 42r
Purdan Padrig
42r
y rei da hyt pan vei hyspyssach udunt
y petheu a welynt no|r petheu a|dywedei
ef udunt ỽy. Gỽynuydedic badric megys
yd oed o·vunedaỽl y duỽ yr iechyt y|ỽ bo+
byl govunedussach vu yna y wyluaeu
a|dyrwesteu a|gỽedieu a|gỽeithredoed
da. A|phan yttoed ef veỻy yr arglỽyd ies ̷+
su grist gỽaredaỽc a ymdangosses idaỽ.
ac a rodes idaỽ tyst yr euengyl a bagyl.
y rei a enrydedir etto yn Jwerdon yn
wyrthuaỽr greireu megys y mae teilỽg.
a|r vagyl honno a|elwir bagyl Jessu.
a|r arch·esgob pennaf yn|y wlat honno
a geiff y creireu hynny megys arỽyd
pennaduryaeth. Yr arglỽyd duỽ a|duc
padric odyno y le diffeith. ac a|dan+
gosses idaỽ gogof gronn ac yn dywyỻ
o|e myỽn. ac a|dywaỽt ỽrth badric. Pỽy
bynnac a|el dan benyt yn aruaỽc o
ffyd iaỽn y|r ogof honn. a|thrigyaỽ
yndi dydgỽeith a nosweith; ef a burheir
o|e hoỻ bechodeu. A gỽedy kerdo trỽydi
ef a wyl yno poeneu y rei drỽc. ac o|r
byd gỽastat yn|y ffyd; ef a wyl ỻewe+
nyd y rei da. Ac yna y difflannaỽd yr
arglỽyd y ỽrth badric a|e adaỽ ynteu
| « p 41v | p 42v » |