NLW MS. 3035 (Mostyn 116) – page 135v
Brut y Brenhinoedd
135v
y kymerth ynteu y hynt drỽy yr alban parth ac jwerdon
A|gỽedy kaffel o etwin y vudugolyaeth hono. ef a|duc y|lu
drỽy wladoed. katwaỻaỽn. a|ỻosgi y dinassoed a|r trefẏd
a ỻad y kiỽdaỽwẏr* Ac anreithaỽ y gỽladoed. A|hyt tra
yttoed etwin yn dywalhau yveỻy. Yd oed gatwaỻaỽn
yn wastat yn keissaỽ ymchoelut a|e logeu parth a|e wlat
Ac nys gaỻei. kanys py borthua bynac y keissei dyfot y|r
tir yno y bydei etwin a|e lu yn|y ludyas. kanys attaỽ
y dothoed y dewin doethaf yn|y byt o|r yspaen. A elwit po+
litus. a hỽnnỽ a vanagei o ehedyat yr adar a|cher·dedyat
y|syr y etwin. pop damwein o|r a|delhei idaỽ Ac veỻy y|ma+
nagei ynteu pan geissei gatwaỻaỽn ymchoelut y|r tir
Ac y bydei etwin yn baraỽt yn|y|erbyn Ac y|briỽeu y|logeu
A bodi y gytymdeithon. A gỽedy hayach nat oed vn go+
beith ar gaffel ymchoelut dra|e|gefyn y ynys. prydein. o|r diwed
ef a gafas yn|y gygor mynet hyt ar selyf vrenhin y geis+
saỽ porth y|gantaỽ y gynydu y gyfoeth idaỽ drachefyn
A gỽedy trossi eu hỽyleu onadunt parth a ỻydaỽ; yn
deissyfyt y|kyfodes tymestyl yn|y mor A gỽasgaru eu ỻog+
eu ar vyr hyt nat oed vn ohonunt gyt a|e gilyd Ac
ỽrth hynẏ diruaỽr ofyn a gymerth ỻywyd ỻog y brenhin
Ac ymadaỽ a|r ỻyỽ a oruc. A gadu y ỻog ỽrth vynhu y
thyghetuen y ford y|mynhei y harwein A gỽedy eu bot
y·veỻy ym|perygyl agheu ar hyt y|nos hỽnt ac yman
pan deuth gỽaỽr dyd dranoeth. ỽynt a deuthant y ynys
a elwit garneria. Ac yno drỽy diruaỽr lafur y|deuthant
y|r tir Ac yn|y ỻe kymeint o dolur a ỻit a gymerth yndaỽ
o achaỽs yr goỻi y|getymdeithon megys y bu teir nos
a|thri·dieu yn gorwed ar y|wely heb vynu na bỽyt na
diaỽt Ac yn|y petwyryd dyd y deuth idaỽ blys kic hely
| « p 135r | p 136r » |