Breudwd Welsh Prose 1300-1425
Cymraeg

NLW MS. 3035 (Mostyn 116) – page 157v

Brut y Tywysogion

157v

gyt ac ywein y jwerdon a ỻechu yn dirgeledic a|wnant heb
wneuthur dim argywed a gỽedy hyny yd ymchoelaỽd ywein
ac nyt y geredigyaỽn y doeth namyn y bowys. a cheissaỽ
anuon kenadeu at y brenhin a wnaeth ac ny lauassaỽd
neb arwein y|genatỽri hyt at y brenhin. yg|kyfrỽg hyny
y|bu annundeb rỽg Madaỽc a|r freinc o achaỽs y ỻetradeu
yd oed y|saeson yn|y|wneuthur ar y|tir. ac odyno yd|oedynt
yn gỽneuthur kameu yn erbyn y brenhin ac yn dyuot at
vadaỽc. ac yna yd anuones ri·cart ystiwart yn|y ol at va+
daỽc y erchi talu y gỽyr a|wnathoed y|kam y|r brenhin. ac
ynteu a|ỽrthỽynebaỽd hynẏ ac nys talaỽd ac yn gamwe+
daỽc heb ỽybot beth a|wnaei. namyn keissaỽ kyueiỻach
gan ywein ap kadỽgaỽn a hyny a gauas. a gỽneuthur he+
dỽch rog* y rei a|oedynt yn elynyon kyn|no hyny. ac ym+
aruoỻ vchben creireu a|wnaethant hyt na hedychei vn a|r
brenhin heb y gilyd ac na vredycheu vn o·nadunt y|gilyd
ac yna y|kerdyn y·gyt by le bynac y|dyccei y|tygheduen ỽynt
a ỻosgi tref neb vn ỽrda. a|phy beth bynac a|eỻynt y dỽyn
gantunt nac yn veirych nac yn|wisgoed ỽynt a|e dugassant
na neb dim araỻ o|r a|geffynt Y vlỽydyn rac ỽyneb y|koff+
aỽd henri vrenhin garchar joruerth ap bledyn ac anuon ke+
nat attaỽ y ỽybot beth a|rodei ef yr y eỻỽg o|e garchar ka+
nys kanys blin yỽ bot yn hir garchar. ac ynteu a|edewis
mỽy noc a aỻei dy·uot idaỽ a|dywedut y rodei pop dim
oc a archei. ac yn|gyntaf yd erchis gỽystlon o|veibon goreu+
gỽyr y|wlat. Yr eilweith yd erchis Jthel ap ridit y vraỽt a|thri
chant punt o aryant pa ford|bynac y gaỻei dyuot vdunt
nac o veirych nac o|ychen nac o neb ryỽ ford y|gaỻei dyfot