NLW MS. 3035 (Mostyn 116) – page 95r
Brut y Brenhinoedd
95r
gigleu eiroet gynt y|ryỽ yn·vytrỽyd hỽn Ae gỽeỻ kerric o
jwerdon no|r rei ynys prydein pan vynhỽynt ỽy kyffroi an
gỽlat ni ar ymlad dros y kerryc hyn. Gỽisgỽch wyr aỽch ar+
ueu gissgỽch* ac amdiffynỽch aỽch gỽlat. kanys a mi·ui yn
vyỽ ny dygant ỽy y|maen ỻeiaf o|r cor. Ac ỽrth hyny pan
welas vthur pendragon y gỽydyl yn baraỽt y ymlad. Ar
vrys ynteu a|e kyrchỽys ỽynt. Ac o|e|bryssedic vydin heb vn
gohir y brytanyeit a|racoruuant Ac yn|yd oedynt briỽedigy+
on a|ỻadedigyon y gỽydyl ỽynt a gymeỻassant giỻamỽri ar
fo. A gỽedy kaffel o|r brytanyeit y vudugolyaeth. ỽynt a
aethant hyt y|mynyd kilara. Ac ỽynt a gaỽssant y mein
a ỻawenhau a orugant ac enryfedu yn vaỽr a orugant
Ac odyna nessau a|oruc myrdin a|dywedut ỽrth y|nifer a|oed+
ynt yn sefyỻ yno Aruerỽch heb ef oc aỽch deỽred ac oc aỽch
nerthoed y|diot y|mein hyn A gỽybydỽch ae nerth yssyd drechaf
ae ynteu ethrylithyr a|chywreinrỽyd Ac ar hyny o arch myr+
din ymrodi a|orugant paỽb o vn vryt drỽy amryfaelon dysc
y|geissaỽ diot y|mein. Rei a|dodei raffeu ereiỻ a thidyeu ereiỻ
ac yscolyon. Ac eissoes ny dygrynoes hyny o dim vdunt. A gỽedy
dyffygyaỽ paỽb a|phaỻu eu nerth yn hoỻaỽl vdunt chỽerthin
a oruc Myrdin A|pharatoi y|geluydodeu ynteu a|e|peiraneu
A gỽedy daruot idaỽ kyweiraỽ pop peth o|r a oed reit idaỽ
yn yscaỽnach noc y geỻit y gredu y diodes ef y|mein. A gỽedy
eu diot y|peris ef eu dỽyn ỽynt hyt y|ỻogeu Ac eu gossot
yndunt Ac veỻy gan lewenyd y|deuthant hyt yn ynys
prydein gyt a|hyrrỽyd·wynt Ac odyna yd aethant hyt y
ỻe yd oedynt bedeu y gỽyr·da hyny A gỽedy menegi hynẏ
y emrys wledic ynteu a enynaỽd kenadeu drỽy hoỻ raneu
gỽledi ynys prydein Ac erchi y baỽb o|r ỻeygẏon a|r yscolhei+
gon yn ỻỽyr ym·gynuỻaỽ a dyuot hyt y|mynyd ambyr
| « p 94v | p 95v » |