Breudwd Welsh Prose 1300-1425
Cymraeg

NLW MS. Peniarth 12 part ii – page 40r

Ystoria Lucidar

40r

yỽ hynny. o welet y rei hynny ym poeneu heb y haedu. ac ỽyn+
teu yng|gogonyant heb y haedu heuyt. yna y byd mỽy eu|diolỽch
ỽy y duỽ. am eu diangk trỽy y rat ef o|r poeneu a|obrynynt. discipulus
Pa|boen a|vyd ar y rei bychein Magister Tywyỻỽch e|hun. discipulus A argyw+
eda dim y|r rei bychein o|e geni o gamwelyeu megys o buteinrỽyd
neu o garesseu. neu o|dynyon creuydus. Magister Nac argyweda dim
o chaffant vedyd. mỽy noc y|r|gỽenith a|dykit yn ỻedrat a|e heu o
leidyr. discipulus A argyweda pechodeu y rieni y|r meibyon. neu|bechodeu
y meibyon y|r rieni. Magister Ysgriuennedic yỽ nyt argyweda y|r tat
ynvytrỽyd y mab. nac y|r mab ennwired y tat. o·nyt synny+
ant paỽp o·nadunt a|e|gilyd. megys nat argywedaỽd y Josuas.
bot y dat gynt yn drỽc kyn·noc ef. na|e vab yn|da wedy ef ka+
ny chytsynnyassant. kanys o|chytsynnya y rieni a|r|plant
a|r meibyon a|e rieni am eu|drỽc e|hunein yna yd|ant yng
kyvyrgoỻ. discipulus. Ae gorthrỽm priodas kares. Magister Nac ef herwyd an+
nyan. herwyd gossot yr eglỽys hagen maỽr yỽ. discipulus Pa delỽ y
profy di hynny. Magister Nyt bỽyta yr aual a|vu drỽc a|phechaỽt. na+
myn y vỽyta yn erbyn gorchymyn duỽ a|vu vỽyaf pechaỽt.
discipulus Paham y kymerth y tadeu gynt y karesseu. Magister Ny charei
y gỽyr gynt onyt eu kedymdeithyon. megys y|dywedir. Car
dy gedymdeith. a|chassaa dy elyn. ac ỽrth hynny y|dugant ~
eu kereint megys y geỻynt eu karu. a nyni a|dylyỽn karu
an gelynyon. megys y|dywedir. kerỽch. a chanys y gỽaet a
gymeỻ karu y kereint. y gossodes yr eglỽys ynteu trỽy yr
yspryt glan kymryt merchet yr estronyon. megys y bo gỽ+
reic y·rom ni a|r estronyon yn rỽym karyat. ac o hynny y
ỻetta drỽy yr|hoỻ dynaỽl genedyl y kareat y·ryngthunt. discipulus