NLW MS. Peniarth 190 – page 80
Ystoria Lucidar
80
delỽ y provy di hynny. Magister Nyt bỽyta yr aual
a vu drỽc a|phechaỽt. namyn y vỽyta yn
erbyn gorchymun duỽ a vu vỽyaf y pechaỽt.
discipulus Paham y kymerth y tadeu gynt eu ka+
resseu. Magister|Ny charei y gỽyr gynt o·nyt eu
kedymdeithyon. megys y dywedir. Car dy
gedymdeith a|chassaa dy elyn. ac ỽrth hynny
y dugant merchet eu kereint megys y
geỻynt eu karu. a nyni a|dylyỽn garu yn
gelynyon. megys y|dywedir. kerỽch. a chan+
ys y gỽaet a|gymheỻ caru y kereint. y gos+
sodes yr|eglỽys trỽy yr yspryt glan kymryt
merchet yr estronyon. megys y bo gỽreic y+
rom ni a|n estronyon yn rỽym karyat. ac
o hynny y ỻetta drỽy yr hoỻ dynaỽl genedyl
y karyat y·ryngthunt. discipulus Pa delỽ y provy
di nat pechaỽt priodi karesseu. Magister Po·nyt
kannyat y|r deu vroder priodi y dỽy chỽi+
ored. discipulus Kennyat. chwaer vyng|gỽreic i a|vyd
cares ymi o|e gỽaet hi. elchỽyl vym|braỽt
inneu a|vyd car y|m gỽreic i. drỽy vyng|gỽaet
inneu.
| « p 79 | p 81 » |