NLW MS. Peniarth 32 (Y Llyfr Teg) – page 175
Llyfr Iorwerth
175
ỽrth nat edewis dim o|e da idaỽ namyn y ewyỻys.
O|deruyd. y dyn holi dylyet yn|dydyeu dydon; na|choỻi
na|chael ny wna yr hynny. ony byd dodi oet coỻi
neu gael yndunt. ac os hynny a deruyd. cỽbyl a
goỻir. ac veỻy am|dir a daear yn amseroed y dyly+
er karcharu kyfreith. O deruyd. dywedut o vorỽyn dỽyn treis
arnei. a|r gỽr yn gỽadu. a|dywedut o·honei hitheu
o·ny dugost di dreis arnaf|i; morỽyn ỽyf|inneu etto.
Sef a varn kyfreith. yna; y hedrych. Sef a|e hedrych; yr etlig.
O|deruyd idaỽ ynteu y chaffel hi yn wreic; ny eiỻ y
gỽr wadu. ac yna talet ef idi y chowyỻ. a|e hỽyneb+
werth a|e hamobyr a|e dilysrỽyd. O|deruyd. idaỽ ynteu
y chaffel hi yn vorỽyn; bit hitheu ar vreint morỽ+
yn. ac ny chyỻ y breint yr y phrofi. O deruyd. dỽyn tre+
is ar wreic. ac yn|y treis hỽnnỽ kaffel beichogi o+
honei. ac na wypo hitheu pỽy vo y dat. a|r arglỽyd
yn mynnu y hamobyr. a hitheu yn dywedut na
dylyir; kanys treis a|ducpwyt arnei. ac na dyly
vn|wreic o|r a|dreisser talu amobyr. Sef a|dyweit
kyfreith. yna diffodi yr amobyr; kanny aỻaỽd yr arglỽ+
yd y chadỽ rac treis. ac ef yn dylyu y chadỽ. kẏt
amheuher hitheu am hynny; ny cheffir y gen+
thi namyn y ỻỽ e|hun ar vot yn wir a dyweit. a
mab y kyfryỽ wreic honno; ỽrth genedyl y vam
y bernir y vreint yny wyper pỽy vo y|dat. O deruyd
y wr dywedut bot gỽreic yn veichaỽc o·honaỽ.
| « p 174 | p 176 » |