NLW MS. Peniarth 32 (Y Llyfr Teg) – page 56
Llyfr Iorwerth
56
nat aduỽyn. O|deruyd. y dyn tebygu bot yn ryd mach
o|e vechni o talu peth o|r dylyet a heb dalu kỽbyl.
Nyni a dywedỽn hyt na byd ryd ef. a dylyu o·ho+
naỽ vot yn vach ar y geinyaỽc diwethaf. ual ar
y|gyntaf. O|deruyd. bot mach adeuedic ar beth. a bot ne+
gefydyaeth gan y kynnogyn am dalu. Jaỽn yỽ y|r
mach rodi gỽystyl. kyfreith. Sef yỽ gỽystyl kyfreithaỽl; y trae+
an yn weỻ no|r tal. O|deruyd. ỻudyas rodi gỽystyl. y
mach bieu hebrỽg y gỽystyl gyt a|r haỽlỽr hyt yn
diogel. ac a|dyly kymryt y ffonnaỽt gyntaf o byd
ymlad. ac ony wna hynny. talet e|hun y dylyet.
O|deruyd. keissaỽ o|r mach dỽyn gỽystyl heb yr haỽlỽr ̷
yn|y gyffroi; ny|s|dyly. o·ny byd negyfydyaeth kyfreithaỽl
yn|y wyd. O|r gỽeles ynteu negyfydyaeth yn er+
byn yr haỽlỽr kynno hynny; ynteu a|eiỻ rodi
gỽystyl y|kynnogyn y|r haỽlỽr yn|y apsen. O|chan+
hatta y kynnogyn y|r mach rodi gỽystyl punt
yn ỻe un geinyaỽc; a chynn oet y gỽystyl coỻi
hỽnnỽ. Ny dyweit. kyfreith. dylyu ohonaỽ drachefyn
namyn dimei. kanys hynny yỽ traean keinhaỽc
kyfreith. O|deruyd. rodi kywerthyd punt yn ỻe keinhaỽc
yg|gỽystyl. a|dygỽydaỽ y gỽystyl; nyt atuerir
y|r kynnogyn kymeint ac un ffyrỻig. kanys ef
e|hun a lygraỽd breint y wystyl. Pỽy bynhac a
wystlo gỽystyl a|thebygu o·honaỽ ef ỽrth
nat oes vach arnaỽ; vot y gỽystyl yn|annilis.
| « p 55 | p 57 » |