NLW MS. Peniarth 32 (Y Llyfr Teg) – page 95
Llyfr Iorwerth
95
troetued yn|y uerrieu. ac ỽyth yn|y veieu. a deudec
yn|y gesseilieu. ac vn ar|bymthec yn|yr|hirieu. a
gỽialen kyhyt a honno yn ỻaỽ y geilwat. a|r
ysgỽr berued y|r hirieu yn|y ỻaỽ araỻ idaỽ. a hyt
y kyrhaedo a honno gan hyt y vreich yỽ deu
deu* eiryonyn yr erỽ. Sef yỽ hynny; ỻet yr erỽ
gyfreithaỽl. a|dec ar|hugein y honno yn hyt yr
erỽ. Pedeir erỽ y honno ym·pop tydyn a dyly
bot. Pedwar tydyn ym pob randir. Pedeir ran+
dir ympob gauael. pedeir gauael ym·pob tref.
Pedeir tref ympob maenaỽr. Deudec maen+
aỽr a|dỽy|dref ympob kymỽt. Y dỽy dref a dyly
bot yn reit y brenhin. vn o·honunt yn tir ma+
ertref idaỽ. a|r ỻaỻ yn diffeith hauottir idaỽ.
a chymeint a hynny oỻ yn|y kymhỽt araỻ.
Sef yỽ hynny o eirif erỽi y cantref; dec degweith
a dyly bot yn|y cant. ac nyt a rif beỻach dec. a
hynny yỽ rif o erỽi a vyd yn|y cantref. Pedeir
erỽ kyfreithaỽl ym·pob tydyn. vn ar bymthec ym·pob
randir. Pedeir a|thrugeint ympob gauael. vn
ar bymthec a|deugein a|deucant yn|y tref. Pedeir
erỽ ar|hugeint a mil ympob maenaỽr. Chwech
erỽ a phedwar ugeint a|deucant. a|deudeg|mil
yn|y deudec maenaỽr. yn|y dỽy dref a berthyn
y|r ỻys y dyly bot deudec erỽ a phump cant.
Sef yỽ hynny gỽedy y|del oỻ y·gyt yn|y kymỽt
| « p 94 | p 96 » |