NLW MS. Peniarth 9 – page 18v
Ystoria Carolo Magno: Rhamant Otfel
18v
nys bydy orderch ditheu ymi o|th
garyat ti. minheu a haydaf glot ac enỽ. a
llawer pagan gyr bron dinas atalie a vyd
marỽ gan vygledyf gloyỽ kanys keueis
vedyd. Ac y titheu ameraỽdyr dylyedaỽc
y gorchymynnaf vy gorderch yny delhom
y vessyd* lumbardi a ni a|y pieiuydỽn hỽy
ar weirglodyeu ygkylch atalie pan darffo
ymlad garsi ameraỽdyr.
AC yna kyrchu y llys a orugant. y bren+
hin a|y varỽneit gyt ac ef. a|y bỽyt
oyd paraỽt. a gỽedy dyrchauel bordeu a
thanu llieineu. y bỽyt* yd|aythant. ac rac
blinaỽ y datkanyat. pan vu amser gantunt
y sỽper a gỽedy gỽassanayth diwall ar ba+
ỽb. ar gỽin yn amhyl. y brenhin a ayth y ys+
tauell. A phaỽb y letty y orffowys. ac y gys+
cu yn|y ol yd aythanth* Ac y kaeyssant y
drysseu hyt tranhoyth wedy kyuot yr he+
ul. Ac yna y kyuodes y brenhin ac yd ym+
gynnullỽys y uarỽneit yn|y gylch. ac yd
ayth y eisted ar vỽrd o vayn mynor yr neu+
ad a|ffon odidaỽc yn|y laỽ a hoylon eur we+
dy yr ffustaỽ yndi yn amhyl. Ac y dywaỽt
ỽrthunt val hyn. arglỽydi varỽneit heb
ef gỽerendeỽch vi. a chyghorỽch canys dy+
lyỽch vyg kyghori. A marsi vrenhin val
y clyỽsaỽch drỽy y kedernit yr dyuot o·ho+
naỽ ym kyuoyth a|y vot yn llosgi vygkes+
| « p 18r | p 19r » |