Cardiff MS. 1.363 (Hafod 2) – page 63r
Brut y Brenhinoedd
63r
yn y lle dyot y arỽeỽ e hỽn a orỽc a gwyscaỽ arỽeỽ
y brenyn amdanaỽ. ac yn y lle|annoc|y brytanyeyt
a orỽc a gyrrỽ grym ac angerd yndỽnt ac erchy ym+
kadarnhaỽ yn ymlad megys kyt bey ef ỽey Gwey+
ryd. Ac yna y brytanyeyt ymkadarnhaỽ a wna+
ethant ỽrth y annoc ef megys kyt bey ef ỽey Gw+
ydyr. kanys ny wydynt ettwa ry lad eỽ brenyn.
Ac o|r dywed eyssyoes llythraw a orỽgant y|rỽueyn+
wyr yn dwy rann. ac yn dypryt waradwydỽs|adaỽ
y maes. Ac yna yd aeth Gloew kessar ar rann o|e lw y
gyt ac ef a chymryt y longheỽ yn kedernyt a|dioge+
lwch Jdaw A haymo ar|rann arall y gyt ac ynteỽ
a ffoassant yr koedyd ac yr mynyded kany chaỽs+
sant o yspeyt mynet yn eỽ llongheỽ. Ac yna teby+
gỽ a wnaeth Gweyryd bot yr|amheraỽdyr yn yr
rann honno o|r llwv a bryssyaỽ a orỽc ynteỽ ac eỽ her+
lyt wynt o le pwy gylyd hyt pan y godywedaỽd
wynt ar lan y mor y lle y gelwir yr avr honn o enw
ef porth hamỽnt. neỽ ynteỽ Sỽdhamptỽn. kanys eno
yd oed porthloed a dyskynỽa adas y longheỽ. ac eno
yd oedynt llawer o newyt longheỽ. ac yn yr rei
hynny y mynnassey haymo mynet yndỽnt. pan
deỽth Gweyryd yn dyssyỽyt am y penn ac yn diannot
| « p 62v | p 63v » |