Breudwd Welsh Prose 1300-1425
Cymraeg

Cardiff MS. 3.242 (Hafod 16) – page 105

Buchedd Mair o'r Aifft

105

gei y chorf o hynny aỻan. ac yn ufud dihewydus adoli prenn y
groc. a|dyuot drachefyn a|oruc att delỽ y wynvydedic ueir. a
dywedut ỽrthi gan ymdiret. Arglỽydes kyfarỽyda di vi yn|y ỻe
y mynnych. O cherdy di heb yr arglỽydes y tu draỽ y eurdon+
en. ti a|geffy orffowys da. ac ar y geir hỽnnỽ kerdet a|oruc
yn|gyflym o drỽs y demyl. ac y|rodes un idi deir keinyaỽc. ac
yr y rei hynny y prynaỽd hitheu teir torth. a phan ymach+
ludyaỽd yr heul y nos honno y doeth y|eglỽys Jeuan vedydyỽr
ar lann eurdonen. A thrannoeth wedy kymryt yno corf yr
arglỽyd y|tu draỽ y eurdonen y diffeithỽch ac y ynyalỽch. Ac
yno y bu heb vỽyt yn|dieisseu gỽedy y chymunaỽ seith|mlyn  ̷+
ed a|deugeint. ac a|vu o|e buched yn|ol. nyt amgen dỽy vlyn+
ed ar|bymthec y buchedockaaỽd ar y their|torth. Y dỽy vlyned
ar|bymthec kyntaf y doeth hi y|r didrif y kafas aflonydỽch y
gan y chnaỽt. A chan ganhorthỽy y wynuydedic ueir eissoes
ny pheriglaỽd hi. Ac eissoes pan nessaaỽd teruyn y buched y
kyuarwydaỽd duỽ attei mynach. zozimas oed y enỽ. a hith+
eu a|uanagaỽd idaỽ ef kyffes y hoỻ vuched. A phan|doeth yn+
teu y|ỽ vanachlaỽc y managaỽd y|ỽ vrodyr y gyfrangk. a|r
vlỽydyn rac·wyneb nos Jeu cablut yngkylch gosper pan
yttoed y mynach yn|kerdet yr vn|didrif gynt a|chorf yr|arglỽ+
yd ganthaỽ. a pheth bỽytỻỽru idaỽ e|hun. nachaf hitheu yn
dyuot. gỽedy dodi arỽyd y groc arnei yn kerdet yn|droetsych
dros eurdonen. megys ar uaes gỽastat hyt att zozimas.
a chymryt y ganthaỽ corf y harglỽyd a|oruc. A gỽedy y|gyn+
nic idi o|r mynach hi a|gymerth ychydic o|r bỽyt. ac yn vn agỽ+
ed ac y|dathoed ymchoelut trỽy y dỽfyr a|oruc. a gỽediaỽ zozimas