Oxford Jesus College MS. 119 (The Book of the Anchorite of Llanddewi Brefi) – page 46r
Ystoria Lucidar
46r
ryonn y|daỽ yr angel keittỽat. a|llaỽer o|engyly+
on ygyt ac ef y|dỽyn eneit gỽreic pỽys krist
o garchar y corff gann gywydolyaetheu. A|cher+
dev. A diruaỽr oleuni. Ac aroglev hynaỽs. y lys
nef. nev y ysprydaỽl baradỽys. A|e lle corffora+
ỽl yỽ paradỽys. A|e ym pa|le y|mae. Nyt lle corffor+
aỽl ef. cany chyuanedha ysprydoed yn lleoed
corfforaỽl. lle y|mae pressỽyluot ysprydaỽl yr
rei gỽynnvydedic a|wnnaeth doethineb tragy+
ỽyd o|r dechreu yn|y nef daallus. yn|y lle y|mae
dỽyỽolder. Ac yd ymhoelont wynep yn wyneb.
A dygit yno eneideu y|rei gỽiryon. Eneidev y
rei perffeith pann elont o|e corfforoed a|dygir
yno yn|y lle. Pỽy yỽ y|rei perffeith. Y|rei nyt
digaỽn gantunt y|gorchymynnev. namyn gỽn+
neuthur a|wnant mỽy noc a orchymynner
vdunt. megys y|mae y|merthyry. Ar kreuydỽ+
yr. Ar gỽerydonn. kannys merthyrolyaeth yỽ
gỽeryndaỽt. Ac ymỽrthot ar byt kanny orchy+
mynnỽyt hynny. namyn dỽyỽaỽl gynghor yỽ.
Ac am wneuthur hynny ohonunt. y|mae yn
eidunt teyrnnas nef megys o dreftadaỽl dyly+
et. megys y|dyỽedir. pann rodho ef vn o|e garedi+
gyon ef. llyna dref tat yr arglỽyd. Rei o|r rei
gỽiryon yntev annuonir o|e dỽyn yr|lle hỽnnỽ.
| « p 45v | p 46v » |