NLW MS. Llanstephan 27 (The Red Book of Talgarth) – page 75r
Buchedd Beuno
75r
naeth beuno lawer o wyrtheu drỽy nerth duỽ y rei ny aỻei dyn
o|r byt hỽnn eu riuaỽ. Ac yn|yr amser hỽnnỽ ef a|damchweiny+
aỽd mynet vn o weithwyr aberffraỽ y lys ynyr gỽent. ac o|r
byt nyt oed was ieuangk degach no hỽnnỽ. A phan|weles merch
ynyr gwent y gỽas ieuangk hỽnnỽ. hi a|e|caraỽd hyt na
mynnei hi vot hebdaỽ ef. a|r brenhin a adnabu hynny yn|y
ỻe ac a|e gỽybu. ac a|dewissaỽd rodi y|r gỽas hỽnnỽ y verch yn
briaỽt. rac y gymryt ohonei o aruer araỻ. dieu oed ganthaỽ
ynteu rac tecket y gỽas a|e aduỽynet y vot yn vab y vrenhin
ac yn|dylyedaỽc. a gỽedy talym o amser ef a ymchoelaỽd y gỽ+
as Jeuangk hỽnnỽ a|e wreic y·gyt ac ef tu a|e wlat. ac a doeth+
ant hyt y ỻe a|elwit pennard yn aruon. ac yna y disgynnas+
sant y ar eu meirch. a gorffowys a|wnaethant yno. ac o dra+
blinder a ỻudet kysgu a|syrthyaỽd ar yr unbennes. Sef a|w+
naeth ynteu a|r vnbennes yn kysgu. yn|y uedỽl kewilydyaỽ
yn ormod y vot yn mynet tu a|e wlat a gỽreic kymoned a
honno y·gyt ac ef. ac nat oed le y gyrchu a|hi o·nyt bot yn
reit idaỽ mynet drachevyn y|r gỽeith ỻe buassei gynt yn en+
niỻ y vỽyt yndaỽ. ac yna o annoc kythreul a|e gledyf a|hi
yn|y chỽsc ỻad y phenn a|oruc. ac yna y kerdaỽd ef racdaỽ
y tu a|e wlat. a|r meirch a|r eur a|r aryant gant* hyt att y
brenhin. ac o|r da hỽnnỽ prynu y gan y brenhin medyant
a|sỽyd. nyt amgen bot yn distein idaỽ. Sef a|oruc bugelyd
beuno arganuot y corff. ac yn ebrỽyd dyuot y uenegi hyn+
ny y veuno. Sef a|wnaeth beuno yna dyuot yn|dilesc y·gyt
ac ỽynt hyt y ỻe yr oed y corff. ac yn|y ỻe kymryt y penn a|e
wasgu ỽrth y corff. a|syrthyaỽ ar dal y linyeu. a gỽediaỽ duỽ
| « p 74v | p 75v » |