NLW MS. 3035 (Mostyn 116) – page 142v

y bu vrỽydyr heilin yg kernyỽ. A gỽeith garth maelaỽc a chat pen

coet yn deheubarth. ac yn|y teir brỽydyr hyny y|goruu y brytanyeit

Deg mlyned ar|hugeint a seith cant oed oet crist pan vu vrỽydyr

y|mynyd carn. Deugeint mlyned. a|seithcant oed oet crist pan vu

varỽ beda offeirat. ac yna y|bu varỽ owein vrenhin y|picteit.

Deg mlyned. a deugein a|seithcant oed oet crist pan vu y vrỽydyr rỽg

ẏ|brẏtanyeit a|r picteit yg gỽeith maes edaỽc ac y ỻadaỽd y bry+

tanyeit. talargan brenhin y|picteit. ac yna y bu varỽ teỽdỽr vab

beli. ac y|bu varỽ rodri brenhin y|brytanyeit. ac etbalt vrenhin

y|saeson Trugein mlyned. a seithcant oed oet crist pan vu vrỽẏdẏr

yrỽg y|brytanyeit a|r saesson yg gỽeith henford. ac y|bu varỽ dy+

uynỽal uab teỽdỽr. Deg|mlyned a|thrugein a seith gant oed oet

crist pan symudỽyt pasc y|brytanyeit drỽy orchymun elbot. gỽr

y|duỽ. ac yna y|bu uarỽ fernuail vab idwal. a|chubert abat ac

yna y|bu distryỽ y deheubarthwyr gan offa vrenhin. Petwar|ugein

mlyned a|seithcant oed oet crist pan diffeithaỽd offa vrenhin. Y brytanyeit

yn amser haf. Deg|mlyned a|phetwar|ugein a seithcant oed oet crist

doeth y|paganyeit yn gyntaf y Jwerdon ac y|bu varỽ offa vren+

hin. a|maredud brenhin dyfet. ac y|bu brỽydyr yn rudlan. ~

ỽythcant mlyned oed oet crist. Pan ladaỽd y|saeson garadaỽc brenhin

gỽyned. ac yna y|bu varỽ arthen vrenhin keredigyaỽn. ac y

bu diffyc ar yr heul. ac y|bu varỽ rein brenhin dyfet. a chadell

brenhin powys. ac el·bot archesgob gỽyned Deg mlyned