NLW MS. Peniarth 11 – page 124r

ac a|dywaỽt na|welsei y chyn|decket eirioet. Ac ygyt a|hynny heb

ef pei gỽnelut vyng|kynghor ti a|gymerut y blaena o|r keirỽ y

wellau y larder. Ochan gei heb·yr arthur milyeinyeid oed vy|ng+

hynghori i ueỻy. ac ny mynnỽn yr teyrnas loegyr y wneuthur o+

honaf. Yna yr unbennes a|dywaỽt ỽrth arthur. arglỽyd heb hi ke+

neuin yỽ kei a|dywedut mileindra. a|mi a|wnn na wney di pob

peth o|r a|archo ef. Yna yd erchis y brenhin y owein uab uryen gym+

ryt y daryan a|e roi ar y golovyn. ac ynteu a|e kymerth ac a|e roes

yno. Ac vn o|r|llaỽuorynyon a gymerth y bitheiat ac a|e hanuon+

es y ystaueỻ y vrenhines. a|r vnbennes a gymerth y chennat y

gan arthur. ac ynteu a|e gorchymynnaỽd hi y duỽ. Yma y

mae yr ymdidan yn tewi am arthur ac yn|traethu y ỽrth y teir

E ma* y mae iosep yn|dywedut kychwyn  morynyoN.

y teir morynyon ymeith o lys arthur. ac eu|dyuot y fforest

a|gỽedy marchogaeth yngkylch dỽy viỻtir o|r fforest. ỽynt a

welynt yn dyuot ar|hyt fford yn eu herbyn marchaỽc urdaỽl

ar|geuyn march cul ysgyrnic. a|e luryc oed wedy y dryỻyaỽ yn

ỻawer o leoed. a|e daryan oed wedy coỻi y ỻiỽ y arnei. ac wedy tar+

deissyaỽ yn ỻawer o|leoed. a gỽaeỽ maỽrbraff yn|y laỽ. ac yr|aỽr y

doeth ef attunt hỽy kyuarch gỽeỻ udunt a|oruc. a|dywedut. a

vnbennesseu grassaỽ ỽrthyỽch ac ỽrth aỽch kedymdeithyas.

A|e atteb a|orugant ỽynteu a|dywedut. ỻewenyd ac anturyaeth

da a ro duỽ y|ttitheu. A vnbennes heb ef o ba le yr yttyỽch chỽi yn

dyuot. Yr ym yn|dyuot o wled y mae yr amheraỽdyr arthur

yn|y wneuthur. ac ae yno y|mae y|th vryt titheu vynet heb hi.

Nac ef heb ef. eissyoes myui a|vum yno lawer gỽeith. a|ỻaỽen