NLW MS. Peniarth 11 – page 176r
Ystoriau Saint Greal
176r
a|elwir meliottys o loegyr. Clamados a|doeth geyr bronn
y vrenhines ac a dywaỽt. arglỽydes ˄heb ef. etto yd|ỽyf|i yn er+
chi ytti wneur* kyvyaỽnder a|mi. am y marchaỽc a|ladaỽd
vyn|tat a|m ewythyr. Veỻy yd ỽyf|inneu heb·y meliot. yn
adolwyn kael kyuyaỽnder kanys reit yỽ ym vynet yme+
ith. ac ny ỽnn i yn erbyn pỽy yr|ỽyf yn ym·gynnic. namyn
vy apel i yssyd am ffelỽniaeth. kanys o ffelỽinaeth y ỻadaỽd
ef vy ỻeỽ i. ac wedy hynny crogi y benn ỽrth vym porth yr
tremic ac ammarch y mi. Ac yna kymryt y uanec yn|y laỽ
a|chynnic y wystyl a|oruc ef. Clamados heb y vrenhines gỽ+
arandaỽ ar a|dyweit y marchaỽc yna. Arglỽydes heb ynteu
gỽir yỽ ỻad o·honaf|i y leỽ ef. ac eissyoes kynt y ruthraỽd ef
y myui. no myui idaỽ ef. a hynny ti a|wdost vot yn vỽy a|wn+
aeth ymi o|drỽc y gỽr a doeth yma neithywyr. ac am hynny ar+
glỽydes diodef di gennyf dial ohonaf ar hỽnnỽ yn|gyntaf
a|wnaeth a mi. Je heb hi ti a|wely vot y marchaỽc racko yn
mynnu mynet ymeith ar|hynt. ac am hynny ymrydhaa
y ỽrthaỽ efo yn gyntaf a gỽedy hynny ni a vedylyỽn am
y|ỻaỻ. Arglỽydes duỽ a|dalo ytt heb·y meliot. a mi a|baraf
y walchmei y diolch ytt. kanys y ỻeỽ a|oed y|m amdiffyn i
rac vyng|gelynyon. ac yn amdiffynn dy|dir ditheu heuyt
yr oed ef. ac yr ammarch y minneu heuyt y croges ef y
penn ar y porth. Y vrenhines yna a|dywaỽt mae mileindra
maỽr oed idaỽ hynny pryt na wnathoedut ti idaỽ ef chỽ+
eith drỽc yn|y blaen. ac am hynny ny pheỻir ytti yn vy ỻys
i o|gyffredinỽch. ac os y vatteil a vynny di y gỽrthot ny
vyd arnat chweith gogan. Arglỽydes heb·y clamados.
| « p 175v | p 176v » |