NLW MS. Peniarth 11 – page 4r

a|dywaỽt. hedỽch yỽch heb ef. A gỽedy hynny ef a|dywaỽt. arthur

heb ef ỻyma vi yn|dwyn attat ti y marchaỽc urdaỽl damunedic.

˄a henyỽ o lin dauyd brofỽyt. ac o iosep o arimathia o achaỽs yr|hỽnn y g˄orffwyssa˄nt hoỻ anturyeu a ryuedodeu brytaen vaỽr a|r gỽ+

ledyd ereiỻ oỻ. a ỻawen vu arthur ỽrth y kennadeu a|r|chwedleu

hynny. a|e groessaỽv a|oruc. a|dywedut ỽrthaỽ. a|wrda heb ef nin+

neu a vuam yn|y aros ef yr ys|talym o amser. ac beỻach yd ym yn

tybyeit mae trỽydaỽ evo y gorffennir anturyeu seint greal. Myn

vyng|cret heb y gỽr llỽyt ti a|ỽely dechreu tec idaỽ yn ehegyr. Ac

yna peri tynnv y arueu y|am y marchaỽc a|oruc y gỽr ỻỽyt. a|e

adaỽ ynteu y myỽn peis o|syndal coch a sỽrcot a|ffỽryr yndi o er+

min gỽynn. Ac yna y gỽr ỻỽyt a|erchis y|r marchaỽc ieuanc

y ganlyn. Ac ueỻy y doethant hyt yr eistedua beriglus yn ym+

yl y ỻe yd oed laỽnslot yn eisted. a|dyrchauel y ỻenn a|oruc y gỽr

ỻỽyt y ar yr eistedua. a|gỽelet yn ysgriuennedic yndi o lythyr

newyd. weldy yma eistedua galaath. A|r gỽr prud a|dywaỽt ỽrth

y marchaỽc ieuanc. eisted di yn|y ỻe hỽnn kanys tydi bieu.

Ac ynteu|a|eistedaỽd ac a|dywaỽt ỽrth y gỽr prud. Tydi a|eỻy

weithyon vynet drachevyn. kanys ti a|wnaethost yr hynn a

orchymynnwyt itt. a|r gỽrda a|e gadawaỽd ynteu veỻy ac a

aeth ymeith gan gymryt kenyat arthur a|e varỽnyeit. Ac yna

govyn a|wnaethpỽyt idaỽ o pa|le y dathoed. ac ynteu a|dywaỽt

na|s|dywedei ef udunt ỽy yna. hyt yn amser araỻ. Ac ueỻy ago+

ri y drỽs a|oruc y gỽr ỻỽyt a mynet ymeith y·gyt a|e gedymdei+

thyon a|oedynt yn|y aros ~  

P an welas y milwyr ereiỻ y mackỽy ieuanc yn eisted

yn|y ỻe yd arswydassei laỽer gỽrda kyn|no hynny ryued