NLW MS. Peniarth 18 – page 27r
Brut y Tywysogion
27r
uaỽr luossogrỽyd o|r freinc ar flemisseit y ymlad ar
kastell. ac yn dyỽyssogyon yn|y blaen. Meibon ger+
alt ystiỽart. a gỽilim ap haet. a|phan ỽelas Meredud
ap Gruffud y gỽr y gorchymunyssit idaỽ gadỽryaeth y
castell a|e amdiffyn. y elynnyon yn dyuot mor deissy+
uyt a|hynny. gyrru kalon yn|y ỽyr a|oruc a|e hannoc
y ymlad a bot yn drech gantaỽ y vryt noe oet. kanys
kyn bei bychan y oet etto. eissoes yd oed gantaỽ ỽei+
thret Marchaỽc ac angrynedic dyỽyssaỽc yn annoc
y|ỽyr y ymlad ac yn trychu e|hun y|elynnyon ac ar+
ueu. a|phan ỽelas y|elynnyon bychanet oed y nifer
yn amdiffyn o uyỽn y castell dyrchafael ysgolyon ỽrth
y muroed o|pop parth a|ỽnaethant. ac ynteu a|odefaỽd
y elynnyon y ysgynu tu ar|bylcheu. ac yn dilesc ef a|e
ỽyr hỽynt a ymhoelassant yr ysgolyon hyny syrth+
aỽd y gelynyon yn|y claỽd gan yrru ffo ar y rei ereill.
ac adaỽ lliaỽs onadunt yn veirỽ ar|hynn a|dangosses idaỽ
y detỽyd dyghetuen rac llaỽ ar gaffael ohonaỽ daỽn ar
wledych·u yn|y deheu. canys goruu ac ef yn vab ar laỽer
o|ỽyr prouedic yn ymladeu ac ynteu ac ychydic nerth y
gyt ac ef. yn diỽed y ulỽydyn honno y|bu varỽ run ap
yỽein yn ỽas Jeuanc clotuorussaf o genedyl y|bryttanny+
eit yr hỽnn a|gyuansodassei ac a vagassei bonhed y rie+
ni yn ardyrchaỽc. Canys tec oed o|furyf a|drych. a|hynna+
ỽs o ymadraỽd a|huaỽdyr ỽrth baỽp. racỽelaỽdyr yn|rod+
yon. vfyd ym|plith y|dylỽyth. balch ym|plith estronnyon
| « p 26v | p 27v » |