NLW MS. Peniarth 18 – page 57r
Brut y Tywysogion
57r
1
ỽyr adaỽ y|muroed a|rodi y|castell. Y ulỽydyn racỽy+
2
neb y|bu varỽ Jon y|breỽys o|greulaỽn aghev ỽedy
3
y|yssigaỽ o|e varch. Ac yna y|bu varỽ iarll caerlli+
4
on. Ac y|bu varỽ efream escop llann elyỽ. Y|ulỽy+
5
dyn racỽynep yd atgyỽeiraỽd ricart Jarll ker+
6
nyỽ braỽt henri vrenhin castell maessyueid yr
7
hỽnn a distryỽassei llywelyn ap ioruerth yr ys dỽy|vlyned
8
kynn o|hynny. Y|ulỽydyn honno y kyrchaỽd llywelyn
9
ap ioruerth. Vrecheinaỽc. Ac y|distryaỽd* holl gestyll
10
A|threuyd y|ỽlat drỽy anreithaỽ. Ac yspeilaỽ pob
11
lle. Ac ymlad a|chastell aber hoddni vis a|oruc
12
gyt a|blifyeu. A|magnelev. Ac yn|y diỽed y|peidaỽd
13
drỽy y|ymhoelut y dref oll yn lluduy*. Ac odyna
14
ar|y ymhoel y|llosges tref golunỽy. Ac y|darestyg+
15
aỽd dyffryn teueidat. Ac odyna y|kyrchaỽd y|cas+
16
tell coch. Ac y|byrryaỽd yr llaỽr. Ac y|llosges tref
17
croes osỽalld. Y ulỽydyn honno y|bu teruysc rỽg
18
henri vrenhin. A rikert marscal iarll pennuro.
19
Ac yna y kyt·aruolles y|iarll a llywelyn ap ioruerth. Ac
20
a|thyỽyssogyon kymry. Ac yn|y lle kynnullaỽ dir+
21
vaỽr lu a|oruc ef ac yỽein ap grufud. A chyrchu am|penn
22
aber mynyỽy|a|ỽnaethant a|e llosci. A gỽneuthur
23
aerua o ỽyr y brenhin a|oedynt yn cadỽ. odyna
24
yn ebrỽyd y goresgynnassant hynn o gestyll. nyt
25
amgen. caerdyf. Abergevenni. penn kelli. bla+
26
enllyfni. bỽlch y dinas. Ac y|byrryassant oll yr
| « p 56v | p 57v » |