NLW MS. Peniarth 32 (Y Llyfr Teg) – page 91
Llyfr Iorwerth
91
byn mab am tref y tat. Nyt dilys y dyn y
dyuotyat y|dir onyt trỽy vraỽt y kyfreith. neu o es+
tyn arglỽyd. Rei a dyweit o|r ỻedir dyn am
dir; dylyu o|e etiued y tir hỽnnỽ yn waettir ud+
unt gỽedy hynny. Y kyfreith. a dyweit nat gỽaettir
vn. namyn tir ỻofrud a|dalher yn gyfreithaỽl
gỽedy na bo ar y helỽ dim a|dalho nac o gein+
haỽc baladyr nac o|dim araỻ. ac a varn na
dylyir ỻad un dyn namyn y ỻofrud ny
wnel y kỽbyl. a|r tir hỽnnỽ a dylyir y rannu
y·rỽg y genedyl; mal y dylyit rannu yr ala+
nas. Pỽy|bynhac a|odefho mỽynhau y tir
un dyd a blỽydyn heb dỽryf heb eniwet ac
yn vn wlat ac ef. ac eisted ar y tir. kyfreith. a|dyw+
eit na dyly ef atteb o|r tir hỽnnỽ gỽedy hyn+
ny. namyn y bot yn haỽl tra|blỽydyn. Sef
yỽ tỽryf ac eniwet; ỻosgi tei a thorri ereidyr.
Pỽy bynhac a|bieiffo tir yng|glan traeth; ef
bieiuyd kyflet ar tir o|r traeth. a|gỽnaet goret
arnaỽ os myn. dyeithyr o bỽrỽ y mor peth y|r
tir. neu y|r traeth hỽnnỽ; y brenhin bieiuyd.
kanys pyn·varch brenhin yỽ mor. Tri|thlỽs
kenedyl. melin. a choret. a|pherỻan. a|r rei
hynny ny dylyant eu rannu nac eu kychỽyn
oc eu ỻe; namyn rannu eu frỽytheu y|r neb
a|e dyly·ho. Tir corfflan; ny dylyir y rannu
| « p 90 | p 92 » |