NLW MS. Peniarth 6 part iv – page 20
Geraint
20
dy vynnu ti a|wnaf|i am y gennadỽri honno. LLyna dy gyg+
hor am hynny heb··yr arthur. kyt boet dyhir gen ̷+
hyf am dy vynet ti. mynet o·honot y gyfanhedu dy
gyfoeth ac y gadỽ dy teruyneu. A chymer y|nifer a uyn ̷+
hych gyt a thi a mỽyhaf a gerych o|m ffydlonyon i. yn
hebrygyeit arnat Ac o|th garant titheu a|th gytuarch+
ogyon. Duỽ a|talho itt a minheu a wnaf hynny. Reit
yỽ i|minheu heb·y Gỽenhwyuar vedylyaỽ am ganhebrygy+
eit a diwallrỽyd ar yr vnbennes yssyd gyt a minheu.
Jaỽn a wney heb·yr arthur. Ac y|gyscu yd aethant y|nos
honno. A thranoeth y|gellygỽyt y kennadeu ymdeith
A dywedut udunt y deuei. Ereint. yn eu hol. A|r trydydyd
gỽedy hynny y kychwynnỽys Gereint. Sef nifer a aeth y+
gyt ac ef. Gỽalchmei. A Rioganed. Mab. brenhin iwerdon
Ac ondryaỽ. Mab. duc bỽrgỽin. Gỽilym. Mab. Rỽyf ffreinc.
Howel. Mab. emyr|llydaỽ. Elifri anaỽ kyrd. Gỽyn. Mab. trin ̷+
gat. Goreu. Mab. Custennin. Gỽeir gỽrhyt uaỽr. Garanhon
.Mab. Glythmyr. Peredur. Mab. Efraỽc. Gỽyn llogell gỽyr yg ̷+
nat llys arthur. Dyuyr. Mab. alun dyuet. Gỽrei gỽalstaỽt
ieithoed. Bedwyr. Mab. bedraỽt. Kadỽri. Mab. Gỽryon. Kei
.Mab. Kynyr. Odyar ffranc ystiwart llys arthur. Ac edern. Mab.
Nud heb·y|gereint. a|glywaf|i y vot yn gallu marchogaeth
a|uynnaf y dyuot gyt a|mi. Je heb·yr arthur. Ny weda itti
dỽyn y gỽr hỽnnỽ gyt a thi kyn boet iach hyny wneler
tagnefed y rygtaỽ a gỽenhwyuar. Ef a allei y wenhwyuar ygyt a|mi
y|ganhadu ar veicheu. Os canhatta; canhadet yn ryd
o|e veicheu. kanys digaỽn o gymỽyeu a gouityeu yssyd
ar y gỽr yn lle sarhaet y uorỽyn gan y corr. Je heb·y gỽenhwyuar
| « p 19 | p 21 » |