NLW MS. Peniarth 9 – page 60v
Ystoria Carolo Magno: Chronicl Turpin
60v
auel y dỽylaỽ a oruc ef dros y rei a dygỽydassei
o|y gedymdeithyon yn|y vrỽydyr honno a gỽedy+
aỽ gantunt val drostaỽ y hun can doythant y
alltuded y ỽrthlad sarascinneit ac y gynhal dy
enỽ a|th dedyf gristynogayth a dial dy wayt
Ac y maynt yma yn gorwed gỽedy eu llad o sa+
rassinneit yn ymlad drossot ti a dilewyn dru+
garaỽc arglỽyd manneu eu pechodeu hỽynt.
a|rydhaa eu heneideu y ỽrth boyneu uffernaỽl
anuon dy archegylyon kyssegredic yn eu kylch
oc eu diffryt rac tywyllỽch. Ac eu dỽyn y der+
nas nef. y gyt wledychu a|th verthyri di val
y gỽledychy ditheu y gyt ar mab ar tat ar ys+
bryt heb dianc heb orffen ameN. Ac yn hyn+
ny a|theodoric yn ymadaỽ ac ef yn|y gyffes. ar y
wedi honno y kerdaỽd eneit rolond o|y corff. Ac
y duc egylyon y orffowys dragywydaỽl lle ny
byd na thranc na gorffen gyt ar merthyri val
y haydaỽd y gỽynaỽ val hyn. Dywyllỽr y tem+
leu. kynydỽr kyỽ·dadoed. medeginyayth diogel
y|ovidieu gỽlat. Gobeith yscolheigyon amdiff+
yn morynnyon ymborth yssywedigyon. hayl
ỽrth bellenigyon. doyth o bỽyll ac o annyan.
ffynyaỽn ygneidyayth. prud o|y gyghor. gỽan
y uedỽl. gỽraỽl y weithret. Eglur y ymadraỽd.
karedic ganthaỽ pob dyn val pei braỽt idaỽ vei
pob cristaỽn. Ac yn|y volyant ynteu bot teg+
ỽch yn marchogayth. A phan yttoyd eneit ro+
lond verthyr yn mynet o|y corff hanner mei
| « p 60r | p 61r » |