Cambridge Trinity College MS. O.7.1 – page 57r
Llyfr Blegywryd
57r
segyrllyt a wnelher yr eglỽys·wyr
a dylyir y iaỽnhau vdunt yn|y sened
herwyd kyfreith eglỽyssic. Tri pheth
a dyly pob braỽdỽr y warandaỽ y
gan y kynhenwyr kyn barnu neb
o·honunt yn ennill nac yg|collet.
nyt amgen cỽyn a deissyf. ac atteb.
Pỽy bynhac a gollo peth trỽy vraỽt
tremyc. ef a dichaỽn rodi gỽystyl
yn|y erbyn pan y mynho. o vyỽn
vn dyd a blỽydyn. yn|y vlỽydyn gyn ̷+
taf y caffo ef y gan y brenhin ar
braỽdỽr a rodes y varn yn sefyll
ỽr* gyfreith trỽy veint o amser hỽn ̷+
nỽ. Os o vyỽn yr amser hỽnnỽ yd
ymỽystla ef yn erbyn y varn. ef a
dylyir eturyt idaỽ y holl gollet yn
diohir. ac ef a dyly kynhal hỽnnỽ
yn rỽymedic ỽrth gyfreith hyt pan
rother dosparth trỽy lyfreu kyfreith
y·rydaỽ ar braỽdỽr am y varn tre ̷+
myc. megys y gỽypper pỽy a orffo
neu a orffer. ar braỽdỽr a dyly et ̷+
uryt dros y brenhin o da hỽnnỽ
| « p 56v | p 57v » |