NLW MS. 3035 (Mostyn 116) – page 48r
Brut y Brenhinoedd
48r
Ac ỽrth hynny y kauas ynteu bot yn vrenhin. Ac eissoes
herwẏd y warder ef ny mynỽys ef bot meibon ỻud y
diran o|r deyrnas namyn rodi y auarỽy. lundein a
jarỻaeth geint Ac y teneuan jarỻaeth gernyỽ. Ac
idaỽ e|hun coron y deyrnas ~ ~ ~ ~ ~ ~ ~
A c yn yr amser hỽnnỽ megys y|keffir yn ystoryaeu
gỽyr rufein gỽedy daruot y vlkessar oresgyn freinc
a dyuot hyt yg glan y|mor ar traeth. A gỽedy ar*+
gauot ohonaỽ odyno ynys prydein a gỽybot py|dir oed
A|phỽy oed yn|y chyfanhedu y dywaỽt y|mae vn gene+
dyl oed wyr rufein a|r brytanyeit. kanẏs o eneas yd
hanoedynt ỽy a|r brytanyeit. Ac eissoes o|m tebic
neur deryỽ vdunt digenedlu y ỽrthym ni. kany ỽ+
dant beth yỽ milỽryaeth ỽrth eu bot y|myỽn eigaỽn
odieithẏr y|bẏt yn pressỽylaỽ. Ac ỽrth hẏnẏ heb eff
dybygaf. i. haỽd yỽ eu kymeỻ y dalu teyrnget y|rufein+
aỽl amherodraeth megys y|tal yr hoỻ vyt. Ac eissoes
heb ef jaỽn yỽ anuon y erchi teyrnget vdunt. kyn
ỻafuryaỽ gỽyr kymeint a gỽyr rufein y eu kymeỻ
Ac rac codi priaf hen yn hendat gan eỻỽg gỽaet an
kereint. A|r ymadraỽd hỽnnỽ a dodes vlkessar y|myỽn
ỻythẏr Ac a anuones at gaswaỻaỽn vab beli brenhin
y brytanyeit. A|phan datkanỽyt y gaswaỻaỽn y|ỻythyr
Sorri a oruc Ac anuon ỻythyr at vlkessar a oruc yn+
K Aswaỻaỽn brenhin y brytan +[ [ teu yn|y mod hỽn.
yeit yn anuon anerch y vlkessar. A|ryfedu meint
sychet a|whant gỽyr rufein y eur ac aryant mal
na adant dynyon odieithẏr y|bẏt val yd·ym ni heb ef
yn diodef perigleu yr eigaỽn y|myỽn ynyssed heb gẏmeỻ
teyrnget arnadunt. A|menegi idaỽ nat oed digaỽn gan ̷+
| « p 47v | p 48v » |