Breudwd Welsh Prose 1300-1425
Cymraeg

NLW MS. 3035 (Mostyn 116) – page 64v

Brut y Brenhinoedd

64v

tagnefed a|hedỽch. Sef a|wnaethant kyfodi yn en·ryde+
dus yn eu herbẏn ac ygyt ac y|doethant rac bron ky+
nan y|hanerchassant o bleit amherodron rufein a|e sened
A|menegi idaỽ a|wnaethant ry anuon maxen a chena+
dỽri gantaỽ y|gan amherodron rufein ar eudaff
vrenhin ynys prydein. Ac yna y gofynỽys kynan
meiradaỽc py achaỽs yr dothoed ỻu kymeint a
hỽnnỽ gantaỽ a dywedut nat oed debic y gerde+
dyat kenadeu namyn y gerdet gelynyon a vynynt
anreithaỽ gỽladoed Ac yna y dywaỽt y kenadeu nat
oed dec kerdet gỽyr kyfurd a|maxen yn anogenedus
heb luosogrỽyd o getymdithon enrydedus y·gyt ac
ef. kanys veỻy y|mae teilỽg kerdet y·gyt a|phob vn
o amherodron rufein rac kael perigyl a|chewilyd
y gan eu gelynyon. kerdet toruoed ỻawer a bydi+
noed y eu kadỽ y ford y kerdont. Tagnefed a geissant
tagnefed a dyborthant ac arỽyd yỽ hẏnnẏ. Yr pan
doethant y tir yr ynys hon. ny wnaethant sar+
haet na threis y|neb. Namyn yr eur ac aryant
prynu eu kyfreideu megys kenedyl dyborthaỽdyr
hedỽc* heb geissaỽ nac*|threis nac yn rat dim y|gan neb
Ac ual yd oed kynan meiradaỽc yn pedrussaỽ beth
a wnelhei ae ymlad ac ỽynt ae hedychu Dynessau
attaỽ a wnaeth karadaỽc jarỻ kernyỽ a gỽyrda
ygyt ac ef a chyghori hedychu ac ỽynt A chyn bei
drỽc gan gynan rodi hedỽch a wnaethpỽyt vdunt
A dỽyn maxen y·gyt ac ỽynt hyt yn ỻundein at
eudaf vrenhin y brytanyeit a dywedut mal y daroed
A c yna y kymerth karadaỽc ~ idaỽ ~
jarỻ kernyỽ gỽyrda ygyt ac ef A|gỽedy eu
dyfot