NLW MS. Peniarth 11 – page 107v

hynny. A ryuedu a|oruc ef y alaath adolỽyn y|ryỽ rod honno y ar+

glỽyd. Ac yna paredur a|ovynnaỽd idaỽ paham yd|oed ef yn ado+

lwyn o|e arglỽyd y ryỽ rod honno. Mi a|e dywedaf ytt heb·y gala+

ath. y nos araỻ heb ef yn ỻys brenhin peleur pan|dangosses ies+

su grist yni ryuedaỽt seint greal. yno y gỽeleis i o|dirgeledi+

gaetheu ual yd|oed vyng|kallon i yn|gyn|esmỽythet a|phei buas+

swn marỽ i yn|y pỽngk hỽnnỽ na|buassei varỽ cristaỽn eiryoet

yn gyn|hyfryttet. kanys yr oed yno o engylyon ac o|betheu yspry+

daỽl mỽy noc a|eỻit y datkanu. ac am hynny y hadolygeis i y|m

harglỽyd teruyn ar vy hoedyl pan y hadolygỽn idaỽ. kanys

mi a debygaf y gỽelaf|i etto o|r|dirgeledigaetheu y gymeint ar+

aỻ neu a|uo mỽy. ac yna y mynnaf|i vynet o|r|byt hỽnn. Ac ue+

lly y menegys galaath y paredur dyuodyat ar y angeu. ac y+

n|y mod y menegeis i y chỽi y coỻes y rei o|loegyr seint greal o

achaỽs eu pechodeu. a|megys yr anuones iessu grist y iosep ac

y ereiỻ o|e etiuedyaeth ynteu seint greal o achaỽs eu daeoni. ~

veỻy y coỻes gỽyr brytaen ynteu achaỽs eu pechodeu. Ac uelly

y bu y|tri chedymdeith yn|hir. Ac yna paredur a bỽrt a dywedas+

sant ỽrth galaath. arglỽyd heb ỽy y gỽely hỽnn a|wnaethpỽyt

ar|dy vedyr di. ac ny chysgeist yndaỽ eiryoet. a thi a|dylyut gys+

gu yndaỽ kanys uelly y mae y llythyr yn|dywedut. ac ynteu yna

a|dywaỽt yd aei y gysgu y|r|gỽely. ac yna ef a|aeth ac a|gysgaỽd. A

phan deffroes galaath a|e gedymdeithyon ỽynt a|welynt dinas sar+

ras geyr eu bronn. ac yna y|dywaỽt ỻef ỽrthunt. eỽch aỻan heb

ef weissyon|duỽ. a|dygỽch ryngoch aỽch|tri y tabyl aryant hỽnnỽ

yn|y mod y mae. ac na roỽch y|r ỻaỽr ef yny deloch y|r capel ysprydaỽl.