NLW MS. Peniarth 11 – page 135r

duỽ ar y drossi fford yr oed y vryt. Ac ar aỻel o·honaỽ orffen y ew+

yỻys drỽy enryded. Ac ueỻy marchogaeth a|oruc ef yny vu bryt

gosper. ac yna ef a|dywanaỽd ar|gyuanned yn|y fforest gỽedy y

damgylchynu o|dỽfyr tec redegaỽc. heb goỻi dim o|e redec yny  ̷

delei y|r mor. a gỽyd maỽr tec yn|y gylch o·gylch ual yd|oed anaỽd

idaỽ welet y ỻys gan y gỽyd. gỽalchmei a|drosses parth ac yno

ar vedyr ỻettyaỽ. Ac ual y dynessaaỽd tu a|r ỻys ef a|welei yn eis+

ted ar y bont korr bach. yr hỽnn a gyuodes y vyny. ac a|dywa+

ỽt. Hanpych gỽeỻ walchmei. a|grassaỽ duỽ ỽrthyt. a|gedymde  ̷+

ith heb·y gỽalchmei antur da a|rodo duỽ y|ttitheu. a pha|le y

gỽeleist di vy·vi pan y|m|adnepych ual hynn. Mi a|th weleist di

heb ef y|myỽn tỽrneimant. ac myỽn ˄amser weỻ ny aỻut ti dyuot

vyth. Paham heb·y gỽalchmei. Yr arglwyd nyt yttiỽ gartref.

heb y korr. eissyoes y mae yman yr arglỽydes. y|wreic deckaf a

chymhennaf oc yssyd ym brenhinyaeth loegyr. ac nyt|oes arnei

o|oet mỽy noc ugein|mlỽyd. A vnben heb·y gỽalchmei pỽy henỽ

yr arglỽyd. Ef a|elwir marius eidic. a|mi a|af y dywedut y|r

arglỽydes dy vot ti yn dyuot heb y korr. a ryued vu gan wal+

chmei meint y ỻewenyd yr oed y korr yn|y wneuthur idaỽ. a

mynychet oed welet mileindra ar eu kyfryỽ ỽy. Y korr a|doeth

racdaỽ hyt yr ystaueỻ yn|y|ỻe yd oed yr|arglỽydes. Kyuot yn

vuan arglỽydes heb ef. a|gỽna lewenyd y walchmei y milỽr

goreu. yr|hỽnn yssyd yn dyuot y lettyaỽ yman heno. Am hyn+

ny heb yr arglỽydes yr ỽyf aflawen inneu. a heuyt yd ỽyf law+

en. Aflawen ỽyf kanys efo y marchaỽc yd erchis vyng|gỽr

o|r|delei yma na|s ỻettyỽn. kanys nyt oed gỽreic a|dianghei y

ganthaỽ.