NLW MS. Peniarth 11 – page 202v
Ystoriau Saint Greal
202v
gelynyon oedynt y|r wreic wedỽ ac o|e mab. Myn vyng|cret heb+
y paredur weldyma hỽnnỽ y chwi. ac ar hynny ymgyffroi tu ac
att vn onadunt a|e daraỽ. yny vu reit idaỽ ym·adaỽ a|e gyfrỽy
ac ymgỽffau a|r ỻaỽr. a|r pedwar marchaỽc ereiỻ pob vn a
drewis yr eidaỽ yny oed bop vn o hynny gỽedy eu hanafu yn
drỽc. a|r chwechet a ymroes. ac ueỻy y|peris eu dỽyn ỽynteu
yng|karchar. Arglỽyd y corsyd ynteu a|oed yn mynet o hely
parth a|e gartref pan gigleu y berỽ gan y marchogyon. a
thu ac yno y doeth ef kyntaf ac y gaỻaỽd yn|aruaỽc. Arglỽ+
yd heb·yr vn o|r marchogyon ỽrth paredur weld·yma arglỽyd y
corsyd y gan yr hỽnn y dylit kymryt dial ganthaỽ am a
wnaeth. ac edrych di arglỽyd mor aruaỽc y mae ef yn dyuot.
E drych a|oruc paredur ar arglỽyd y corsyd megys y neb
ny charei haeach ohonaỽ. a|thu ac attaỽ y doeth ef o
nerth traet y varch. ac yng|cledyr y dỽyvronn ef a|e trewis
yny vyd ef a|r march y|r ỻaỽr din|dros|benn. a thynnu cledyf
ar hynt. Beth yỽ hynny heb·yr arglỽyd y corsyd. ae vy ỻad
i a vynny di. Nac ef etto heb·y paredur. eissyoes tydi a gey
dy lad yn ehegyr. ac na vit hir|gennyt. ar|hynny arglỽyd
y corsyd a|vỽryaỽd neit yn|y sefyỻ. ac a|hỽylyaỽd y baredur.
a|e gledyf yn noeth yn|y laỽ. a|pharedur ar y dyuotyat a|e trew+
is yny dorres y breich deheu idaỽ a|r cledyf y|r maes. a|r mar+
chogyon a|dathoedynt gyt ac ef ỽynteu a|ffoassant pan wel+
sant y ryỽ dihenyd hỽnnỽ ar|eu harglỽyd. Paredur yna a
beris y dyrchafel ef ar gevyn y varch. a|e dwyn yng|karchaR
a|e roi yn anrec o|e|vam. Ti a|gynhelyeist amot. arglỽydes
heb·y paredur ac arglỽyd y corsyd. am roi y casteỻ yma idaỽ.
| « p 202r | p 203ar » |