NLW MS. Peniarth 11 – page 260v

Ac am hynny mi a anuonaf lythyreu y erchi y laỽnslot dyuot

dra|e|geuyn. A|phan|del ef ni a ymlycaỽn yr hynn yd ỽyt ti yn|y

dywedut. kanys ny mynnaf|i dysgu nac idaỽ ef nac y neb o|m

gỽyr i yr kadarnet vo wrthỽynebu ohonaỽ ef ymi. kanys

yr arglỽyd a|dyly bot yn gadarnach no|e|wr. megys y bo y ovyn

ar ereiỻ. Yna y brenhin a anuones kennat yn ol laỽnslot.

a|r gennat a|doeth hyt att laỽnslot yn ỻe yd oed ym|brenhinyaeth

orient. ac a|roes y ỻythyreu yn|y laỽ. ac yr aỽr y darỻeaỽd ef yr

hynn a|oed yn|y ỻythyreu ef a|gymerth y gennat y gan baỽp o|r

wlat y rei a oedynt drist a doluryus am y vynedyat ef ymeith. ~

L aỽnslot a gerdaỽd racdaỽ yny doeth y gaer ỻion. ac yna

laỽnslot a doeth hyt geyr|bronn arthur. ac a|roes idaỽ

y|deugeint marchaỽc urdaỽl yn|y mod yr athoedynt gyt ac ef.

Yna y brenhin a erchis y vriant wiscaỽ arueu ef a|deugeint o

varchogyon urdolyon y daly laỽnslot. a|e bot gỽedy kinyaỽ yn

baraỽt yn|y neuad a|e kỽrprieu ar warthaf eu harueu. ac ỽyn+

teu a|orugant ueỻy. a|r chwedleu a|doeth att laỽnslot y dywet+

ut peri o|r brenhin dỽyn deugeint marchaỽc yn aruaỽc y|r ne+

uad. Laỽnslot yna a|vedylyawd vot ryỽ orchest ar ˄y brenhin pan

wnelei hynny a|bot yn da idaỽ ynteu wisgaỽ y arueu. ac yn

aruaỽc y doeth ef y|r ỻe yd oed arthur. Arglỽyd heb·y briant y

mae ryỽ uedỽl gan laỽnslot pan del yn aruaỽc y|myỽn heb dy

orchymyn|di. ac am hynny ti a|dylyut ovyn idaỽ paham y|mae

ef yn dyuot ueỻy y wneuthur drỽc ytt. a pha|delỽ yr|heydeist ar+