NLW MS. Peniarth 11 – page 264ar

y helym. Beth a|wney di ueỻy heb aristor. Torri dy benn di heb·y

paredur. a|e|dwyn yn anrec y|m chwaer|i. yr honn y ffaelyeist di o+

honei. Ny wney di hynny heb·yr aristor namyn goỻỽng vi ym+

eith. a mi a vadeuaf ytt vyn|drycewyỻys. Dy dryc·ewyỻys di ~

heb·y paredur a|aỻaf|i y odef yn haỽd. Yna torri penn aristor a|oruc

paredur a|e grogi ỽrth goryf y gyfrwy. a dyuot att y marchaỽc

ehovyn. a govyn idaỽ pa|delỽ yr oed. Arglỽyd heb ef agos ỽyf|i y

angeu. Eissyoes hyfrydach yỽ gennyf kanys gỽeleis di kynn

vy marỽ. Yna paredur a|esgynnaỽd ar y varch ac a|gymerth y

waeỽ. ac a|duc y·gyt ac ef y marchaỽc ehovyn yny doeth y gu+

dugyl meudỽy a|oed agos yno. ac a|e disgynnaỽd yn arafaf ac

y gaỻaỽd. ac a|diosges y arueu. ac a|beris idaỽ gyffessu y hoỻ be+

chodeu. ac a|beris y amdoi wedy y varỽ. ac a|roes y|r meudỽy march

aristor a march y marchaỽc heuyt yr|gỽediaỽ rac y eneit. A|phan

daruu yr offeren a|chladu y corff paredur a|aeth ymeith yn dolu+

ryus am angheu y marchaỽc. Arglỽyd heb y vorwyn ỻei yssyd

ytt beỻach o|e wneuthur. kanys rydheeist y wlat honn o|r ỻeidyr

a|oed yn|diua kỽbyl ohonei. a|chanys goruuost ti ar y|ỻeidyr

hỽnn. Jessu grist a|wnel ytt gael ym·gyuaruot a|r marchaỽc

coch yr hỽnn a ladaỽd dy gevynderỽ. ac nyt oes arnaf|i ovyn na

orffych di arnaỽ ef os gỽely. Eissyoes ovyn yssyd arnaf|i rac

y ỻew. kanys ef a|gar y veistyr a|e|varch yn vỽy no neb. 

P aredur yna a|gerdaỽd heb aros mỽy arnaỽ tu a|r fforest

dovyn. a|r vorwyn yn|y ol ynteu. ac ual y bydei ef ueỻy