NLW MS. Peniarth 11 – page 52r
Ystoriau Saint Greal
52r
y ỻeiỻ heb diỻat o|r neithyaỽr ymdanaỽ. Ac ynteu yna
a|dywaỽt. A unbenn heb ef beth a vynneist ti yma y| my+
ỽn. Dyuot heb ynteu yma a|wneuthum ual y doeth y ỻeiỻ.
Na|doethost myn vyng|cret heb y gỽr. kanys y ỻeiỻ oỻ a do+
ethant yn ỻaỽn o lewenyd ual y|dylyynt dyuot ac a|diỻat
neithyaỽr ymdanunt. a thitheu yr hỽnn a|doethost yma heb
neb ryỽ dim arnat o|r a|berthynei ar neithyaỽr. ac yna y gỽr
a|erchis o|e weissyon y yrru aỻan. a|r gỽr a|dywaỽt ual y clyỽei
baỽp ry daruot idaỽ ef wahod o dylỽyth mỽy noc a|dathoed
y|r neith˄yaỽr. o|r achaỽs y geỻir dywedut. ef a|wahodet ỻawer a|by+
chydic a etholet. y kyffelybrỽyd hỽnn y mae yr euengyl yn|y
dywedut a|aỻỽn ni y welet y|myỽn pererindaỽt y greal. a|r
neithyaỽr a|r wled a|aỻỽn y gyffelybu y tabyl seint greal yn|y
ỻe y|bỽytaant y marchogyon urdolyon kywir. Nyt amgen no|r
rei a|gafas iessu grist ỽynt y myỽn diỻat neithyaỽr. y diỻat
a|aỻỽn ni eu|kyffelybu y ras da y|wneuthur gỽeithredoed da
ac y gyffessu yn vynych. ac y beidyaỽ a|phechu. y rei hynny
a|gaffant dyuot y|r neithyaỽr. a|r wled nyt|oes diank arnei. A|r
ỻeiỻ nyt ant y gyffes ac ny wnelont da a yrrir ymeith o|r ỻew+
enyd y|r boen dragywyd. yn|y ỻe y kaffant o ovit gymeint ac a
geiff y ỻeiỻ o lewenyd. Yna edrych a|wnaeth y gwr ar|laỽns+
lot a|e arganuot yn wylaỽ yn hidyl. megys pei gỽelei geyr y
vronn yn varỽ yr hynn mỽyhaf a|garaỽd eiryoet. Ac yna y
govynnaỽd ef y laỽnslot a vuassei yn kyffessu yr ys|talym. ac
ynteu a|dywaỽt y vot. ac a|dywaỽt idaỽ gỽbyl o|e gyflỽr ual
y kyfaruu ac ef. Ac yna y gỽr a|ovynnaỽd y laỽnslot ar y
| « p 51v | p 52v » |