NLW MS. Peniarth 18 – page 19r
Brut y Tywysogion
19r
hỽnn hyt nat arbettei y cledyf nac y ỽr nac y wreic
nac y vab nac y verch. a|phỽy|bynhac a|delhynt na|s go+
llyghynt heb y|lad neu y grogi neu trychu y aelodeu.
a|phan gigleu giỽtaỽt|bobyl y wlat hynny. keissaỽ a|ỽ+
naethant. pa ffuruf y gallynt cael eu hamdiffyn. ac ue+
lly y gỽascarỽyt ỽynt rei yn llechu yn|y coedyd ere+
ill yn ffo y|ỽladoed ereill. Ereill yn keissaỽ amdiffyn o|r
kestyll nessaf y|dothoedynt o·honaỽ. Megys y|dyỽe+
dir myỽn bryttannaỽl diaereb. y ki a|lya y|gỽaeyỽ
y|brather ac ef. a gỽedy gỽascaru y|llu dan y coedyd.
ef a|damweinaỽd y ywein ac ychydic o nifer ygyt ac
ef kyrchu y coet o amgylch dec a|phetỽar vgeint o|wyr
ac yn edrych a ỽelhynt oleu dynyon yn|ffo. nachaf y
gỽelhynt oleu yn kyrchu tu a|chastell kaer uyrdin lle
daroed udunt gỽneuthur eu hedỽch. ac eu hymlit
a|ỽnaeth hyt yn agos yr castell. a|gỽedy eu daly yno
ymhoelut hyt at y|gedymdeithon a|oruc. Y|ghyfrug hy+
nny y|damỽeinaỽd dyuot llu o|r flemisseit o|ros y|gaer+
uyrdin yn erbyn mab y brenhin. a|gerallt ystiwart
gyt ac wynt nachaf y|rei a|diagassei yn dyuot dan
llef tu ar castell. ac yn menegi y|ry yspeilaỽ o yỽein
ap Cadỽgaỽn a|e hanreithaỽ. A|phan gigleu y flemiss+
eit hynny ennynu a|ỽnaethant o|gassaỽl gyghoruynt
yn erbyn yỽein o|achaỽs y|mynych godyant a|ỽnath+
oed kytymdeithon ywein udunt kynn no hynny. ac
o annocedigaeth gerallt ystiwart y|gỽr y|llosgassei y+
| « p 18v | p 19v » |