Breudwd Welsh Prose 1300-1425
Cymraeg

NLW MS. Peniarth 18 – page 68r

Brut y Tywysogion

68r

yr ryuelu ynn erbyn kymry. Vn ygaer lleon ac
ef e|hun yn|y blaen. Ac arall y|gastell baldỽin ac
yn|y blaen iarll lincol. A rosser mortmer. y|rei hyn+
ny a dodes grufud ap gỽenỽynỽyn yn goresgyn o|e gyf+
uoeth a|gollassei kynn o|hynny. gann atal yr bren+
hin gedeỽein a cheri. A gỽerthrynyaỽn. A|buellt.
Ac yna y|goresgynnaỽd iarll henfford vrecheinnaỽc.
Y|trydyd llu anuones y|gaer vyrdin. A cheredigy+
aỽn. Ac yn|y blaen paen ab patric dysaỽs. Y ulỽy+
dyn racỽyneb y|kylchynaỽd iarll lincol a rosser
mortmer gastell doluorỽyn. Ac ym|penn y pethe*+
hnos y caỽssant ef o eisseu dỽfyr. Yna y kyfuna+
ỽd rys ap maredud. A rys ỽyndaỽt nei y|tyỽyssa+
ỽc a|phaen ap patric. llyỽelyn y|vraỽt a|hoỽel ap
rys gryc a|adaỽssant eu kyuoeth ac a|aethant y
ỽyned. at lyỽelyn. A rys ap maelgỽn a|aeth at
rosser mortmer ac a|rodes y|daregestedigaeth* yr
brenhin yn llaỽ rosser. Ac yn diwethaf oll o deheu+
barth y|kyfunaỽd grufud. A|chynan meibon mere+
dud ap yỽein. A llywelyn ap yỽein y|nei. Ar|brenhin.
Ac velly y|darestygỽyt holl deheubarth yr bren+
hin. Ac y|darestygaỽd paen ap patric yr brenhin
tri chymỽt o vch ayron. Anhunyaỽc a|meuuenyd
ar kymỽt perued. Ac y|daeth rys ap meredud. A
rys wyndaỽt. A|deu vap maredud ap yỽein. y|lys
y|brenhin y|hebrỽg gỽrogaeth a|llỽ kyỽirdeb idaỽ.