NLW MS. Peniarth 33 – page 9
Llyfr Blegywryd
9
idaỽ NAud y|distein yrỽ*; o|r pan de* ̷ ̷+
chruho distein seuẏll ẏnn|ẏ sỽẏd hẏ+
nnẏ el ẏ|dyn diwethaf o|r llẏs ẏ
gẏscu. NAỽd ẏr hebogẏd ẏỽ; he+
brỽng ẏ dẏn hẏt ẏ lle pallaf* ẏ|bu
y|dẏd hỽnnỽ ẏnn|ẏ hebogẏdyaeth.
NAỽd ẏ|braỽdỽr yỽ; hebrỽg ẏ|dẏn
kyhyt o amser. ac o|r pan dechreuher
dadẏl rac ẏ|vron ẏ|bore hyt ban ter+
uynho ẏ dadẏl diwethaf ẏnn|ẏ
dẏd honno NAỽd ẏ penguastra+
ỽt yỽ; tra baraho* redec ẏ|march
kyntaf a|uo ẏnn|y gadỽ NAỽd ẏ|pen ̷+
kenyd ẏỽ; hẏt ẏ|lle pellaf ẏ|breid ẏ
glyỽer ẏ|gornn. NAud gỽasc* ysta*+
uel; ẏỽ; o|r pan elher ẏ|vrỽynha a|th+
annu gỽele* y|brenhin o|r brỽẏn. a|e gu+
dẏaỽ a dillat. ẏr hẏt honno hebrỽg
ẏ|dẏn NAỽd distein brenhines ẏỽ;
o|r pan dechreuho seuẏll ẏnn|ẏ sỽẏd
ynn|ẏr ẏstauell het* pan el ẏ|dẏn diwe+
thaf o|r ẏr* ẏstaueỻ ẏ|gẏscu. NAỽd
offeirat brenhines ẏỽ; hebrỽg ẏ ̷
dẏn hẏt ẏr eglỽẏs nessaf NAỽd ̷
ẏ|bard teulu ẏỽ; hebrỽg ẏ|dẏn at ẏ
| « p 8 | p 10 » |