NLW MS. Peniarth 36A – page 72r
Llyfr Blegywryd
72r
mab arall or wreic or offeirat. ny dyly y
mab a gahat kyn noc ef kyffrannu tir
a| hỽnnỽ; canys yn erbyn dedyf y kahat. Try+
dyd yỽ mut cany rodir y| neb nyt atteppo
drostaỽ. Ac ny rodir gỽlat y ni. Tri def+
nyd haỽl yssyd geir a golỽc a gỽeithret.
Teir golỽc a| dygir y gyfreith. golỽc tyst
oe tystolyaeth. a golỽc managyat o| uanac
A golỽc llygatrud kylus am lad neu losc
neu ledrat; Tri geir kylus yssyd. geir y
gweilyd tauaỽt ymdanaỽ. A gwallaỽgeir
myỽn llys. a| thauaỽtrudyaeth am lad neu
losc neu ledrat. Tri ryỽ wallaỽgeir yssyd
geir gwall yn holi o| rỽy neu eisseu. a geir
gwall yn amdyffyn o|rỽy neu eisseu a
geir gwall yn gwadu. or kyntaf y kyll
yr haỽlỽr y haỽl or a perthyno ỽrth y geir
or dygir tyston yn| y erbyn. ac ny chyll
camlỽrỽ canyt oes camgỽyn kylus
eithyr tri. Or eil neu or dryded y kyll
yr amdyffynnỽr camlỽrỽ a dỽyn*
lỽ or haỽl or a berthyno ỽrth +
r y tystỽyd arnaỽ.
| « p 71v | p 72v » |